May 31 Pra Htum ai Trinita Laban shani, shana maga na Angelus akyu ga tsun ai shaloi Wa Sarabyin a mungga hta, Kawa, Kasha, Chyoi Pra ai Wenyi a makoi magap da ai lam gaw, shinggyim masha ni hpe kahkyin gumdin lam, tsawra myit, kanawn mazum lam a matu hpan da ai lam hpe hpaw shadan dan ai lam hpe myit sumru yu let tsun sang lang dan lai wa ai. Shi tsun ai hta, Trinita a asak hkrung lam gaw, hkrung nga ai hte n htum n wai ai kahkyin gumdin lam rai nna, masha ni hpe Karai Kasang a tsawra myit de woi shang wa nna, n sim n sa ai myit masin ni hpe simsa lam jaw ya nga ai.
Wa Sarabyin gaw, Nikodimu gaw chye na hkawn hkrang lam tam let Yesu hpang de sa wa ai lam hte Karai Kasang gaw wenyi lam hta bai shangai wa ai hku nna shinggyim masha ni a prat hpe galai shai ya lu ai lam hpe mu tam ai lam hpe sang lang dan ai. Yesu a sharin achyin ai lam hku nna Nikodemu a kraw kata na nsin hpe Karai Kasang gaw mungkan ga hpe tsaw ra ai hte shinggyim masha ni hpe mara shagun na matu n re ai sha hkye hkrang la na matu Shi a Kasha hpe shangun dat ai ngu ai tengman ai lam the n-htoi jahtoi ya ai.
Wa Sarabyin Leo gaw, Trinity a makoi magap da ai lam hta, shinggyim masha ni gaw tinang a tengman ai nta hpe mu tam la lu ai lam hpe ahkyak shatai tsun shalawm da nga ai. Kawa, Kasha, Chyoi Pra ai Wenyi a kanawn mazum lam gaw, masha ni hpe hku hkau lam, hkrum katut ai lam, kahkyin gumdin lam hpe manu shadan chye na matu sharin ya nga ai. Dai hte nhtan shai ai hku nna, garan ginhka ai, tinang hkum hpe sha myit ai, kaga masha ni hpe ningdang kau ai gaw yawn hkyen ai lam, hten za ai lam ni hte kaman lila byin shangun ai.
Kaga masha ni Yesu hpe ninghkap tsun shaga ai shaloi mung, tengman ai lam hpe hpaw tawn da ai, tara rap ra ai lam hpe makawp maga ai, kahkyin gumdin ai Wenyi hpe hkam la lu ai wa a kasi ningli langai hku nna Nikodemu hpe madi madun dan ai. Ndai Wenyi hpe ningdang kau ai ni gaw, tsan gang ai, yawn hkyen ai, kabu gara lam n nga ai ni tai wa na hkrit tsang hpa rai nga ai hpe Wa Sarabyin sadi jaw da nga ai.
Karai Kasang gaw masha shagu hpe Shi a tsawra myit a prat de saw shaga ai majaw, Trinita poi gaw shinggyim masha ni a poi mung re ai hpe kam sham ai hpung masha ni hpe shadum ya nga ai. Karai Kasang ra sharawng ai hpe “rai sai” ngu tsun nna, dai Trinitarian tsawra myit hpe hkap la ai lam hpe anhte a prat hta asi si na matu ahkang jaw ai hku nna, Chyoi Pra ai Nu Maria hpe kasi la na matu Hkristan ni hpe n-gun jaw let shi mungga hpe hpung dim dat ai.
Bai nna bat kru ya shana maga Nu Maria lung kaw Rosary hti ai shaloi mung, Wa Sarabyin Leo gaw simsa lam a matu bai hpyi lajin ai the, Karai Kasang gaw mungkan ningbaw ningla ni hpe tara rap ra ai hte grin nga lu ai simsa lam de woi sa wa na matu akyu hpyi ya lai wa ai lam hpe mung chye lu ai.