Daini na Ja Chyum Mungga hpe hti sum ru yu ai shaloi e, kaba dik ai Tara kanu lam hpe na chye lu ga ai. Laika ka ai sara ni hta na marai mi gaw sa nna, Yesu hpe hkang da ai tara matsun ni yawng hta na, gara mahtang grau dik htum rai a ta? Shing nga ga san san ai shaloi, Yesu bai htai ya ai gaw, “Yawng a shawng na mahtang rai nga ai.” Anhte a Madu Karai Kasang gaw langai sha re ai Madu rai nga ai lam hpe shi a san sha tsun dan sai re. Dai gaw, dai Madu na Karai Kasang hpe tinang a myit masin tup hkra hte, tinang a  asak wenyi tup hkra hte, na a chye chyang ai myit tup hkra hte, na a ninggun atsam tup hkra hte, nang shi Madu hpe tsawra lu na ndai. Na a htingbu wa hpe mung na a hkum hte maren nang tsawra lu na rai n dai.

Shing nga nna, ndai hkang da ai tara matsun lahkawng hta grau ai tara kaga n nga ai. Dai gaw anhte shinggyim masha ni yawng a matu kaba dik ai Tara Kanu nan rai nga ai lam a san sha tsun da nga sai re. Shaloi jang laika ka ai sara gaw, Madu nang tsun ai hkrak rai sa. Karai Kasang gaw langai sha nga ai. Shi hta kaga shaje n nga ai. Bai na a myit masin mahkra hte, ninggun atsam mahkra hte, shi hpe tsawra na lam hpe tsun ai. Bai tinang a htingbu wa hpe mung tinang a hkum hte maren tsawra lu na lam tsun nga ai. Dai sara wa gaw, hpaji rawng ai wa hku nna, htan ya ai hpe Madu Yesu gaw anhte yawng mung dai zawn hkan sa ai rai yang, Karai Kasang a mung dan hte n tsang nga ai majaw, tut e hkan sa nga ga law.