Daini na Ja Chyum Mungga hpe hti sum ru yu ai shaloi e, Hkristu gaw Dawi a Madu rai nga ai lam chye na lu ga ai. Shiga madat nu wa ni, dai ni gaw San pra ai Boniface a poi ninghtoi ngu nawku hpung kaw na masat da ai rai nga ai. Dai majaw shi kaw mung tinang ra ai chyeju ni hpe garum hpyi la mai nga ai. Lai wa sai tsa ban (8) hta Germany mungdan kaw nga ai nawku hpung masha ni hta, kabu gara shiga chyam bra ngang kang nga na matu, shi a prat hpe yaw shada ai. Madu Yesu zawn shi gaw, Madu Yesu a hkrang nsam kaja hpe ja ja tsun ndau ai wa re.

Madu Yesu hpe shi a Madu re ai lam kaga masha ni chye hkap la lu hkra mung shi garum shingtau ya lai wa sai. Anhte a matu Yesu gaw kadai re ai lam hpe sung sung li li chye lu na lu hkra hte, dai machye machyang ni hpe kaga masha ni chye na lu hkra garan gachyan ya na matu, anhte yawng hpe saw shaga da nga ai. Ndai San pra ai Boniface gaw, anhte a makam masham hpe gwi gwi hkap la nna, Madu Yesu a galu kaba lam hpe chye hkap yin la lu na matu, shi gaw labau hta ahkyak ai wa langai hku sha n rai, Madu Yesu gaw anhte a hkye la madu nan re ai lam hpe yawng chye hkap la let, kaga masha ni hpe mung dai zawn sha, galaw shakut lu na matu, myit sharawt ya lu nga ai law.