Ndai mabyin gaw, sumsing lamu chyinghka de shang wa na aten hta, akajawng sha si mat ai sut su ai wa a lam hpe tsun dan ai lam re. Yesu gaw shi a man e dan pru nna, nang ndai kaw nga na matu n hkap la ai ngu tsun ai. Dai sut su ai wa gaw Yesu hpe, hpa majaw nye Madu e? Nawku hpung hpe gumhpraw law law ayan jaw ai! Ngai a prat hta nawku htingnu law law hpe gawgap lai wa sai! Matsan mayan ni hpe ngai jaw nngai! Madu gaw shi hpe, Rai sa, dai lam ni yawng hpe nang galaw ai raitim, nang hpe garan kachyan ya ai wa ngu nna shakawn shagrau hkrum na matu galaw ai re.
Nawku hpung hpe jaw ya ai hta (sh) yawng hpe jaw ya ai hta kaja dik ai ladat gaw myit masin kaw na jaw ya ai hte kadai mung n chye ai sha jaw ya ai lam rai nga ai. Anhte a law htum ai kaw na n’jaw ai hte kaga masha ni anhte hpe shakawn shagrau na matu njaw ai.
Kabu gara shiga hta sut su ai ni hte n-gun ja ai ni gaw alu sumbu hta gumhpraw law law jaw ai ni gaw ntsa lam hku yu yang garum shingtau chye ai zawn rai nga ai. Raitim shanhte gaw shanhte a law htum sutgan kaw na jaw ai (sh) shanhte a matu akyu n rawng sai sutgan ni a majaw re.
Dai hte nhtan shai ai hku nna ndai kaw matsan ai hte n-gun n rawng ai gaida jan langai mi gaw loi mi sha manu dan ai gumhpraw kaji lahkawng jaw ai (Marku 12:42). Ndai matsan ai raitim, teng sha gam jaw gam ya chye ai gaida jan gaw, shi a myit masin kaw nna jaw ya ai kaw nna, Yesu a shakawn shagrau ai lam hpe lu la ai. Gaida jan gaw, atsam n rawng ai sha, mungkan ga a shakawn shagrau ai lam hpe hpa mung n ra sharawng ai sha, yawng hpe jaw kau sai.
Nawku hpung hpe jaw ai shaloi mung, yawng hpe jaw ai shaloi mung, myit kraw lawang kaw nna jaw ga. Anhte a gam jaw gam ya ai lam hpe shawa de n shabra ga, jaw ya ai hta shakawn shagrau ai lam hpe n tam ga. Anhte jaw ai gaw lam amyu myu hku nna anhte hpang de bai nhtang wa ai majaw jaw ya ai manu hpe mung n sawn ga.
Anhte teng sha gam jaw gam ya ai rai yang, jaw ya na lam ni htum mat na n re. Kaja wa nga yang anhte teng sha gam jaw gam ya magang Karai Kasang kaw na shaman chyeju grau hkam la lu na re. Anhte hkum anhte malap kau ai hte kaga masha ni a akyu ara hte ra kadawn ai lam ni hpe garum ya magang Yesu anhte hpe grau nna shaman ya na re.