NAWKU DAW JAU AI LAM GAW ANHTE HPE AHKYAK AI LAM DE BAI NHTANG WOI SHAWN AI
June 3 ya shani na General Audience hta, Wa Sarabyin Leo XIV gaw, Chyoi Pra ai Nawku daw jau ai hte seng ai, Sacrosanctum Concilium ngu ai, Second Vatican Council a lam matsun hpe myit sumru yu let, nawku daw jau ai lam gaw, masha ni hpe shani shagu na bungli law law hta lai nna, Karai Kasang hte grau sung ai hku hkrum zup lu na matu karum ya ai lam hpe ahkyak shatai tsun shalawm da ai.
Wa Sarabyin tsun sang lang dan ai hta, nawku daw jau ai lam hta galaw ai htung lailen ni, kumla ni, masat kumla ni gaw shinggan htung lailen ni sha n rai, Karai Kasang Shi a chyeju hpe tsun shaga ya ai ahkyak ai ladat ni re. Liturgy gaw, prat hta tut nawng galaw nga ai bungli kaw na chyoi pra ai hkring sa aten hpe jaw ya nna, kam sham ai hpung masha ni hpe teng sha ahkyak ai lam hpe bai mu tam lu shangun ai hte Hkristu nga nga ai hpe hkam sha lu shangun ai.
Kahtawlik hpung masha ni gaw, anhte a hkum hkrang, masin salum, myit masin yawng hte, nawku daw jau ai lam hta, myit n lawm ai hku sha nga nga na malai, myit lawm hkum lawm shang lawm ra ai, nga nna mung tsun shalawm da nga ai. Nawku dawjau ai lam hku nna, Karai Kasang a mungga hpe madat mara ai, chyeju dum ai, nawku daw jau ai, shada da kanawn mazum ai lam hta rawt jat galu kaba wa ai hta kam sham ai ni hpe shalat ya nga ai.
Wa Sarabyin Leo mung, nawku daw jau ai lam hta kumla ni hte masat dingsat ni a ahkyak ai lam hpe madi madun da nga ai. Chyoi pra ai hka zawn re ai kumla ni gaw hkye hkrang la ai labau hta kashin kamun hkam ai lam hte Karai Kasang a hkye hkrang la ai lam hpe bai myit dum shangun nga ai. Lagaw hput di ai, simsa ai kumla hpe shada da gam garan ai, sakramentu galaw ai lam ni lawm ai kumla ni gaw, wenyi lam hta tengman ai lam ni hpe madi madun nga ai; kam sham ai hpung masha ni hpe galai shai shangun nna, Nawku hpung hta lawm ai ngu ai hkam sha lam hpe ngang kang shangun nga ai.
Wa Sarabyin gaw nawku daw jau ai lam a tsawm htap ai lam hpe manu shadan let, makam masham hkungga lara ai myit hte galaw sa wa na matu, Hkristan ni hpe n-gun jaw da nga ai. Hkrung nga ai hte akyu hpyi ai nawku daw jau ai lam gaw, hkrak kaja ai tara mungga rai nna, masha ni hpe Karai Kasang hpe shanhte a hkum hkrang ting_wenyi, myit masin salum, hkum hkrang hte hkrum zup na matu grau myit hpaw wa shangun nga ai.