Daini na Ja Chyum Mungga hpe hti sum ru yu ai shaloi e, pawt sindawng ai lam na chye lu ga ai. Daini gaw San pra ai Barnabas a poi ninghtoi shani mung rai nga ai. San pra ai Barnabas gaw, shi a wanglu wang lang re ai myit masa hte Paulu hte kaga masha ni hpe garum shingtau ya ai majaw, masha ni shi hpe grai chye ma ai. Shi gaw shada da prinem ai hku nga sa chye ai hkristan wuhpung uhpawng hpe gaw gap nga sa chye ai wa mung re. Anhte a hku hkau lam hta, simsa lam hte shada mara raw ya chye ai lam hpe mung gaw sharawt sa chye ai. Dai San pra ai Barnabas a galaw sa ai kasi kaja hpe anhte mung hkan shatup sa ga.

Shiga madat ni e anhte mung tara lam hpe hkan sa ai hta sha n ga, anhte a myit masin, nga sat nga sa ladat ni mung grai ahkyak ai lam ndai chyum mungga daw hta, tsun da nga sai re. Shing rai pawt sin dawng ai (sh) myit machyi ai lam ni hpe chyu sha manat da ai rai yang, kaga masha ni hpe mang hkang jaw ya nga ai re majaw, sadi ai hte koi yen sa na, mara raw ya ai hte, bai prinem hkra galaw shakut sa na matu aja awa shadum ya nga ai. Kaga masha ni hpe jet ai tsawra myit hte, chye madat ya hkat ai hku shani shagu shakut sa nga ga. Dai hku lu galaw ai rai yang, Madu Karai a tsawra myit hpe shadan shadawng lu ai Karai a kashu kasha ni anhte tai na ga ai.