Daini na Ja Chyum Mungga hpe hti sumru yu ai shaloi e, Hpyen wa hpe tsawra ra ai lam sharin ya nga ai. Ndai chyum mungga hta mu lu ai tinang a hpyen wa hpe tsawra na hte, tinang hpe zingri zingrat ai ni a matu mung, akyu hpyi ya na lam Madu Yesu a sharin shaga ai lam gaw, anhte a matu hkam daga ai lam nan re. Tinang hte ni htep ai ni hpe tsawra na matu sha n rai, hpyen wa hpe mung tsawra na matu shinggyim masha langai mi hku nna gaw, yak hkak na re. Grai loi la ai magam gaw n rai nga ai hpe yawng hte gaw mahkrum madup nga chyalu rai nga na ga ai.

Raitim mung anhte ni Karai Kasang a tsawra myit hpe shadan shadawng ya na matu, shi a hkrang bung sumla hte bung hkra hpan tawn da hkrum ai majaw, Karai Kasang a kasha ni ngu hkinhtawng lu la ga ai. Dai majaw masha shagu hpe matsan dum lama lam madun dan let, pawt sin dawng na a malai, tsawra myit hpe lu madun na, yak hkak jam jau ai ni a matu akyu hpyi ya na, n kaja ai lam ni hta na, kaja ai lam ni hte galaw sa awng dang lu let, Karai a hpang hkan ai kaja masha ni tai let, shi madu a sharin shaga ai tara ni hpe hkan sa na ra nga ga ai. Shingrai n ju n dawng ai ngu ai hta, tsawra na matu lata ai shaloi e, n kaja ai ningmu ni hpe koi yen kau nna, tsawra myit hte shada da chye madat hkat ai a marang e, Karai Kasang hte grau grau bung hkra shakut nga ga law.