June 21 ya shani Angelus akyu hpyi ngut ai hpang, Wa Sarabyin Leo XIV gaw, Mungkan Hpyen Yen Nhtoi hpe ahkyak shatai nna, majan, gumshem ai lam, zingri zingrat lam ni a majaw hprawng yen ra ai masha ni hpe matut nna makawp maga na matu, asuya ni hte wuhpung wuhpawng ni hpe saw shaga dat ai.
1951 ning na tsin-yam tsindam zuphpawng galaw ai 75 ning hpring masat hta, ndai mungkan ting myit hkrum ga sadi laika a hpang e nga ai myit masa gaw mungkan ningbaw ningla ni hpe matut nna lam madun ya na hpe myit mada ai lam Wa Sarabyin tsun da nga ai. Hpyen yen ni a tsin-yam tsindam hpe kadai mung n mai malap kau ai lam hpe ahkyak shatai nna, shim lum lam tam ai ni hpe hkap tau la na matu amyu bawsang ni hpe tsun shadut ai hte, shanhte gaw sari sadang, simsa lam, htawm hpang myit mada lam hte nga lu na re ngu tsun ai.
Wa Sarabyin gaw, Brazil mungdan Ceará mungdaw hta, Basketball ginsup hpung kaw na ramma marai 7 si hkrum ai, yawn hpa lam a matu mung, akyu hpyi ya ai lam galaw lai wa ai.
Dai hta n-ga, Wa Sarabyin Leo gaw, Kahtawlik hte Pentecostal hpung masha ni a lapran, shaning manga shi ning jan chye na hkat ai lam hte jawm galaw ai lam hpe shabyin ya nga ai, Kahtawlik-Pentecostal Mungdan shagu na bawngban hpawng hta shanglawm ai ni hpe shakram lai wa ai. ‘lex orandi, lex credendi’ (“akyu hpyi ai tara gaw kam sham ai tara”) ngu ai npawt tara hpe myit sumru let, mungkan hta Hkristan ni a kahkyin gumdin lam hte rau jawm sakse hkam lu na matu akyu hpyi ai hte makam masham gaw ahkyak ai lam hpe ahkyak shatai tsun dan ai.
