June 21 laban shana maga na, Angelus akyu hpayi aten hta, Wa Sarabyin Leo XIV gaw, akyu rawng ai Hkristan kabu gara shiga hkaw tsun ai lam gaw, akyu hpyi ai, asim sha nga ai, myit sumru ai lam ni hku nna wenyi n-gun lu la ai, Yesu hte langai hkrai a hku hkau lam kaw nna pru wa ai—hpaji masa (sh) zai ladat ni kaw na lu la ai n re ai hpe ahkyak shatai tsun shalawm da ai.

Mahte a Kabu Gara Shiga hta Yesu tsun da ai ga ni hpe myit sumru yu let, Hkristan ni gaw tinang a prat hta Hkristu hpe tinang hkum nan hkam la, hkam sha ngut ai hpang she, Kabu Gara Shiga hpe tengman ai hku hkaw tsun lu na re ngu sang lang dan ai. Hkristan sakse hkam ai lam a teng man ai n-gun atsam gaw Chyoi Pra ai Wenyi hte Karai Kasang a chyeju hpe myit masin mahkra hte hkap la ai lam kaw na pru wa ai re, nga nna tsun ai.

Wa Sarabyin gaw myit sumru ai lam gaw san pra ai ni, jau ni a matu sha n re ai hpe ahkyak shatai tsun da ai; Hkristan shagu gaw asim sha myit sumru, akyu hpyi na matu aten jaw ra ai. Ndai aten ni gaw makam masham hpe grau sung hkra karum ya nna, kam sham ai ni hpe kam mai ai Kabu Gara Shiga sakse ni tai wa hkra karum ya nga ai.

Hkristan ni gaw Mahte a Kabu Gara Shiga hta tsun da ai moi na Hkristan hpung ni zawn, ninghkap ai lam, myit daw myit hten ai lam, hkrit tsang ai lam ni hpe ayan hkrum sha nga ai hpe mung shi yin la ai. Ndai zawn re ai mayak mahkak lam ni nga tim, n dawng n yawt ai lam hpe tsawra myit hte, gumrawng gumtawng ai lam hpe shagrit shanem ai myit hte, myit daw myit hten ai lam hpe shakut shaja ai lam hte bai htang ai hku nna, kam sham ai hpung masha ni hpe sadi dung let matut manoi nga na matu tsun shadut da nga ai.

Wa Sarabyin Leo XIV gaw, shi a mungga hpe, Hkristan ni hpe Hkristu hte ni htep ai hku hkau lam hku nna, tinang a makam masham hpe shangang shakang nna, mungkan de myit mada shara, tsawra myit, ngwi pyaw simsa ai mungga ni hpe la sa wa na matu saw shaga da nga ai.