51. Machyi masha ni hpe kanu tsawra myit hte yu lanu lahku ai, kanu langai mi shi a kasha hpe yu lanu lahku ai zawn, chyoi pra ai num law law gaw matsan mayan ni hpe hkamja lam hte seng nna grau nna lit la galaw lai wa sai. San Pra ai Vincent de Paul a Daughters of Charity, Tsi Rung Nauna ni, Karai Kasang a Hkamja Lam Hte Seng Ai Nauna Kaji ni hte kaga num hpung law law ni gaw, tsi rung ni, asak kaba sai ni a nta ni hte hkum katsing si ai ni a nta ni hta kanu zawn, myit galu kaba nga ma ai. Shanhte gaw shalan shabran lam, madat mara ya ai na, nga nga ai lam, yawng hta grau nna matsan dum myit hpe jaw ya sai. Shanhte gaw, tsi tsi hkam la ai lam n nga ai shara ni hta, law malawng shanhte a lata hte, hkamja lam hte seng ai shara ni hpe gawgap da ma ai. Shanhte gaw san seng ai lam sharin ya ai, ma shangai ai lam hta garum ya ai hte shingra tara hpaji byeng-ya hte sung ai makam masham hte tsi tsi ya ai. Shanhte a nta ni gaw kadai hpe mung n lawm ai sari sadang rawng ai oasis ni tai wa sai. Matsan dum myit hpe hkra ai gaw shawng nnan na tsi rai nga ai. San Pra ai Louise de Marillac gaw shi a kanau num ni rai nga ai Daughters of Charity ni hpe laika ka nna, “shanhte gaw tsi rung ni na machyi makaw hkrum nga ai matsan masha ni hpe daw jau ai a matu Karai Kasang kaw nna langai hkrai shaman chyeju hkam la lu sai” ngu shadum ya ai.
52. Dai ni aten hta, ndai lamu ga jarit gaw, Kahtawlik tsi rung ni, tsan ai shara ni hta nga ai hkamja lam rung ni, nam maling ni hta bungli galaw nga ai tsi rung ni, nanghpam lu sha ai ni a shingbyi shara ni hte majan byin ai shara ni hta nga ai hkai sun tsi rung ni hta matut manoi nga nga ai. Machyi masha ni a lapran Hkristan ni nga ai gaw, hkye hkrang la ai lam gaw, n-gun n rawng ai myit masa n re ai sha, tatut galaw ai lam re ai hpe madun dan nga ai. Hkala nba hpe shamai shatsai ai amu hta, Karai Kasang a Mungdan gaw, n-gun kya dik ai ni kaw nna hpang wa ai ngu nna, Nawku hpung gaw ndau shabra nga ai. Dai hku galaw ai hta, “Ngai machyi nga yang, nanhte ngai hpe kawan yu myit dai” ngu tsun ai Wa hpe sadi dung nga ai (Mt 25:36). Nawku hpung gaw, mang hkang kap ai wa, malu masha n-gun n rawng ai ma (sh) mying n chye ai si wa na masha langai a makau e hput di nga ai shaloi, shi a sung htum ai shaga la ai lam hpe shadik shatup nga ai: grau nna hkrang n sa ai shara hta madu hpe tsawra na matu rai nga ai.