Wa Sarabyin Leo XIV gaw, bat masum ya shani na General Audience hta, Hkristan sak hkrung lam a madung hku nna, Missa hkungga hpe madung tawn nna, Vatican Zuphpawng II a Chyoi Pra ai Nawku Hpung hte seng ai Tara Upadi, ‘Sacrosanctum Concilium’ hpe matut nna, shi a hkaw tsun sharin hpawng hpe matut galaw lai wa sai.

Wa Sarabyin tsun sang lang dan ai hta, Missa gaw “tsawra myit sakramentu” rai nga ai, kahkyin gumdin lam a kumla rai nna, kam sham ai ni hpe Hkristu hte shada da kahkyin gumdin shangun ai chyeju npawt rai nga ai. Kam sham ai ni gaw Missa hkungga hta myit n lawm ai sha, shanglawm nga ai ni n rai, Yesu hte rau Karai Kasang hpe tinang hkum hpe ap nawng da ai active participants ni tai ra ai hpe ahkyak shatai tsun da nga ai.

Wa Sarabyin Leo gaw, Mungga madat hkam la ai lam hte chyoi pra hkum hpe hkam la ai lam gaw nawku daw jau ai lam langai hpe sha pawng hpawm da ai hpe madi madun da nga ai. Karai Kasang a mungga hpe madat mara nna, Hkristu a hkum hte sai hpe hkam la ai hku nna, Hkristan ni gaw Yesu a kasi ningli hpe hkan sa na matu sharin la lu ga ai.

Shi gaw, Missa hkungga gaw kam sham ai hpung masha ni hpe “Madu a lam hta nan hkan sa na matu” sharin ya ai, kahkyin gumdin lam hpe shalat ya ai hte shinggyim wuhpawng, wuhpung wuhpawng, dinghku, langai hkrai a myit masin hpe hkra machyi shangun ai garan ginhka ai lam ni hpe tsi lajang ya ai hku nna magam gun ai lam hpe ahkyak shatai tsun shaleng dan ai.

Shi a myit sumru ai lam hpe, Wa Sarabyin gaw, makam masham hpung masha yawng hpe, Missa hkungga kaw na n-gun atsam lu la nna, anhte galaw nga ai Karai Kasang a makoi magap da ai lam a majaw, galai shai wa na matu ahkang jaw na matu n-gun jaw da nga ai.