Daini na akyu hpyi sumru yu na ga baw hpe:“God Longs for Us to Know His Truth, Karai Kasang gaw shi a tengman lam hpe chye na matu marin nga ai,” ngu hpe la ga.
“Teng man ai lam nanhte chye lu na marin dai rai nna, dai teng man ai gaw nanhte hpe shalawt dat na ra ai,” nga nna Yawhan 8:32 hta mu lu nga ai.
Chyoi pra Chyum Laika hte Chyoi Pra ai Wenyi a shaman chyeju ni hta Karai Kasang gaw anhte tengman ai lam hpe chye na na matu shi ra sharawng ai lam hpe madun dan nga ai. Tengman lam gaw hpyen wa a maw lanyet ni hpe ninghkap lu ai laknak kaba rai nga ai. Tengman ai lam gaw, dai hta myit dik lam lu la ai ni yawng hpe kam hpa myit hte lawt lu lam jaw ya lu ai atsam nga ai. Bai nna Karai Kasang a man hta tengman ai lam gaw Yesu Hkristu hta jinghku hku ai lam npawt nhpang tawn da ai. Dai ni anhte a tsawra myit rawng ai Hkyela Madu hte kanawn mazum ai hta sung sung myit dik ai tengman ai kawsi hpang gara lam hpe Karai Kasang jaw ya u ga.
Karai Kasang galaw ai lam yawng gaw tengman ai lam hpe hkrang shapraw dan nga ai. Anhte a Karai Kasang hta masu hkalem ai lam n nga ai. Bai nna dai majaw shi hte kanawn mazum ai lam hpe madung tawn ai shaloi she anhte a prat hta tengman ai asi hpe hkam sha hpang wa na re. Yawhan 14:6 hta Yesu tsun ai gaw, “Lam gaw ngai rai nga nngai, tengman ai hte asak mung ngai rai nga nngai, ngai hku nna n rai yang gaw kadai mung Wa hpang de du wa lu ai n rai” nga ai. Yesu a asak hkrung lam gaw anhte a tengman ai lam a kasi ningli rai nga ai. Shi galaw ai lam shagu gaw tengman ai lam hpe hkum tsup ai hku madun dan ai lam rai nga ai. Shi a prat hpe hkaja na matu hte shi kadai re ai hpe nhkam sha nchye ai re yang gaw, anhte gaw dawdan n’lu ai hte tengman ai lam daw daw re ai hka hkin gau ntsa e nga nga ai hte bung na re. Shi madu a kasi ningli hpe anhte hkan sa ra ga ai.
Tengman ai lam anhte hpe jaw ya ai asak hpe hkam sha lu na matu, Yesu a asak prat hpe anhte a myit masin hta shawng tawn da ra ai. 1 Yawhan 5:20 hta “Karai Kasang a Kasha du sa nna, tengman ai Karai Kasang hpe anhte chye chyang lu u ga, anhte hpe nyan hpaji jaw mi ai, anhte chye ga ai: Teng man ai Karai Kasang hta e, shi a Kasha Yesu Hkristu hta e anhte rai nga ga ai: shi gaw teng man ai Karai Kasang hte htani htana asak mung rai nga ai.” Yesu gaw hkum shan dagraw la ai Mungga re. Bai nna, Chyoi Pra ai Wenyi hte Chyum Laika a marang e, shi a prat hpe sharin la lu ai sha n-ga, shi hte bung hkra galai shai wa lu na ahkang mung lu la ga ai.
Roma 8:29 hta, “Kaning rai nme law, shi a Kasha gaw kahpu kanau law law hta kasha alat tai u ga, shi a Kasha gaw shi a hkrang sumla hte bung na matu, shi shawng e chye da ai ni hpe, shi a Kasha hpe shawng e san da nu ai” nga nna tsun da nga ai. Nang ngai gaw tengman ai lam hpe tam nna, anhte a prat hta asi si wa ai hpe mu lu na matu hpan da hkrum ai re. Masu hkalem ai hte hkalem hkalau ai nsin hte hpring ai mungkan de tengman ai atsam rawng ai nhtoi hpe htoi tu shangun na matu anhte hpe hpan da ga ai. Raitim Karai Kasang a tengman ai lam hpe n garan gachyan shi yang, dai hpe anhte hpe hpring tsup hkra, galai shai shangun na ahkang jaw ra ai. 1 Yawhan 3:18 hta “Shu sha ni e, n-gup aga hte n rai, amu bungli hte teng man ai hku tsaw ra nga ga” nga nna tsun da nga ai. Tengman ai lam gaw anhte galaw ai lam ni hta dan dawng wa na matu re. Tengman ai lam gaw anhte tsun ai ga hta grau nna anhte a tsawra myit amu ni hte seng nga ai. Kadai mung yaw shada ai lam nlawm ai ga si ni hpe myit hta nrawng ai sha lu tsun nga ai. Masha Hkum hkrang dagraw la sai Yesu, tengman ai lam hta sha nrai yang, kadai mung marai langai ngai hpe teng sha tsawra lu na n rai. Anhte kadai re ai, anhte hpe Karai Kasang gaw anhte a nhkum ntsup ai prat 100% hpring tup tsawra nga ai ngu hpe nlu hkap la hkam sha jang, kaga masha laga hpe hpring tup ai tsawra myit hte lu hkap la na gaw nmai nga ai. Dai madu Yesu hta sha, anhte gaw laga masha hpe lu tsawra hkap la lu nga ga ai.
Karai Kasang a tsawra myit hte Yesu a prat a tengman ai lam hpe na a prat hta daw shagu de shang wa na matu dai ni aten la nga u. Chyum Laika hpe myit sumru let, dai ni na aten hta Yesu a hkrung nga ai, shamu shamawt nga ai hpe hkam sha let, Yesu a hkrang sumla hte maren byin tai wa na lam hpe matut galaw sa wa ga. Karai Kasang a tsawra myit a tengman ai lam gaw Karai Kasang a man e kabu gara ai hte kaga masha ni hpe atsawm sha tsawra ai prat de nang hpe woi sa wa u ga.
1. Tengman ai lam hpe chye na hkam sha lu na ahkyak ai lam hpe myit sumru yu u. Tengman ai lam hpe tam na matu na a ra sharawng ai lam hpe Chyum Laika hpe shabyin ya na ahkang jaw u.
“Teng man ai lam mung nanhte chye lu na marin dai rai nna, dai teng man ai gaw nanhte hpe shalawt dat na ra ai.” Yawhan 8:32 hta mu lu ai.
2. Na a galaw ai lam ni hta Karai Kasang a tengman ai lam gara kaw n htoi n tu nga ai kun? Na a prat hta tengman ai asi hpe gara kaw n hkam sha nga ai kun?
“Shu sha ni e, n-gup aga hte n rai, amu bungli hte tengman ai hku tsawra nga ga.” 1 Yawhan 3:18 hpe hti u.
3. Na a prat a dai daw hpe Karai Kasang hpe ap ya nna, dai ni Yesu a rawn a lai hte bung hkra galai shai ya na matu hpyi nem u. Dai ginra hpe madung tawn da let ai tengman ai lam hpe myit sumru nna, na a baw kaw nna na a myit masin de hkrat wa hkra ahkang jaw u. Karai Kasang nang hpe hkum tsup hkra tsawra na matu shara la nna, na a shani tup kaga masha ni hpe atsawm sha tsawra lu na matu Chyoi Pra ai Wenyi hpe hpyi nem u.
“Teng man ai Wenyi du sa yang, shi gaw shi a myit hte tsun na n rai, shi na la ai hte maren tsun na ra ai rai nna, du na ra ai lam ni hpe mung, nanhte hpe tsun dan na ra ai.” Yawhan 16:13 hta mu lu ai.
Karai Kasang gaw dai ni shi hkum shi nang hpe hpaw shadan dan nna, nang hpe hkum tsup hkra tsawra na hpe ra sharawng nga ai. Shi a mai kaja ai lam hpe nang chyam yu nna mu lu na hpe shi ra sharawng nga ai. Karai Kasang a tengman ai lam hta rawt jat galu kaba wa na matu gaw, hkaja hpan langai mi hpe lung ai (sh) majat langai mi hpe sharin la ai zawn n’re; ndai gaw hku hkau lam hte she seng nga ai. Hkrung nga ai, shamu shamawt nga ai Karai Kasang hte matut mahkai let Chyum Laika a tengman ai lam gaw nang hta hpaw shadan dan u ga. Chyum Laika hta tsun da nga ai Karai Kasang hpe nang nan hkam sha lu nna, Yesu a hta tengman ai lam hpe mu lu u ga. Bai nna, shi a tengman ai lam gaw na a prat daw shagu de shang wa ai shaloi, na a prat gaw dai ni Karai Kasang a tsawra myit hpe grau kaja hkra madun dan lu u ga.
Shiga madat nga ai ni yawng hpe Chyoi Pra ai Wenyi, Shi a simsa ai chyeju jaw ya nna tut e bau sin nga u ga law!
By Cardinal Charles Bo