Daini na akyu hpyi sumru yu na ga baw hpe: “God Longs for Us to Know His Voice, Karai Kasang gaw anhte hpe shi nsen hpe chye na matu sharawng nga ai,” ngu hpe la ga.
“Ngai hpe shaga e, ngai nang hpe htan ya nna, nang n chye yu ai kaba dik ai hte makoi magap da ai lam ni hpe tsun dan na de ai.” Yeremia 33:3.
Karai Kasang gaw atsin sha nga ai, shing nrai, Chyum Laika, kaga masha ni, masa lam ni hku nna sha tsun shaga ai ngu ai myit hte kam sham ai wa hku nna nye a prat law law hpe jai lang wa sai. Karai Kasang gaw dai lam ni hku nna teng sha tsun shaga ai raitim, shi a kashu kasha ni hpe ding tawk hku nna mung tsun shaga mayu nga ai. Karai Kasang a amyu masha ni shi a nsen hpe na nna madat mara let bai htang ai lam ni hpe Chyum Laika hta langai hpang langai hpring chyat nga ai. Ga Shaka Dingsa kaw nna Ga Shaka Ningnan du hkra Karai Kasang gaw shi a amyu masha ni hpe asan sha tsun shaga nga ai. Dai ni anhte a matu ga san gaw, shi madu hpe madat na matu shara jaw na kun?
Yawhan 8:47 hta Karai Kasang kaw na rai nga ai wa gaw Karai Kasang a ga madat nga ai nga nna tsun da nga ai. Bai nna Yawhan 10:27 hta “Nye a sagu ni gaw nye a nsen madat ma ai rai nna, ngai shanhte hpe chye nga ma ai rai nna, shanhte ngai kaw hkan nang ma ai” nga nna tsun da nga ai. Shi a nsen hpe chye shangun mayu ai Karai Kasang hpe she anhte daw jau ga ai. Karai Kasang gaw atsin sha nga ai n rai. Shi gaw atsin sha nga ai n re. Anhte a sumsing Kawa gaw anhte hpe lam madun ya na, anhte a matu shi a myit masin hpe tsun dan na, anhte hte rau prat hpe galaw ya na hpe ra sharawng nga ai. Shi gaw nang hte matut manoi tsun shaga ai lam hte hpring ai hku hkau lam hpe ra sharawng nga ai.
Karai Kasang a nsen hpe na lu ai gaw lata san da ai masha nkau mi a matu sha n rai nga ai. Hkristan nkau ni (sh) shani tup, shani shagu myit sumru, akyu hpyi ai ni a matu sha n’re. Anhte kam sham ai ni hku nna Karai Kasang a nsen hpe shawng na lu ai gaw, shi anhte hpe tsun shaga mayu ai majaw re. Karai Kasang a nsen hpe shi a chyeju hte sha na lu ai.
Dai majaw Karai Kasang a nsen hpe na lu ai gaw gara hku na ai kun? Chyoi Pra ai Wenyi hku nna Karai Kasang gaw nang ngai lapran na ga shaga ai lam hta grau nna asan sha, grau sung ai hku tsun shaga lu ai. 1 Korinhtu 3:16 hta, “Nanhte gaw Karai Kasang a nawku htingnu rai nga myit dai hpe mung, Karai Kasang a Wenyi nanhte hta rawng nga ai hpe mung, nanhte n chye nga myit ni?” Chyoi Pra ai Wenyi gaw ya aten hta nang hte rau rai nga ai. Bai nna shi gaw anhte a kata kaw nga ai majaw anhte a myit masin hpe tsun shaga lu ai atsam nga ai. Shi gaw ga hte tsun shaga lu ai (sh) lama ma hte seng nna shinran (sh) machye machyang jaw lu ai. Shi gaw dawdan lam langai ngai hte seng nna simsa lam hte anhte hpe jahpring ya lu nna, shi ra sharawng ai lam n’re ai lam hpe galaw nga ai shaloi, n’pyaw ai hkam sha lam hpe jaw ya lu ai. Karai Kasang gaw kaga ga shaga ai lam ni hta grau nna hku hkau ai hte asan sha tsun shaga lu ai, hpa majaw nga yang anhte hte shi a lapran hta hpa mading mung n nga ai.
Raitim Karai Kasang gaw shi a nsen hpe anhte hpe galoi mung atik anang n shadut na re. Shi gaw, n hkru n kaja ai lam ni hta jahtau nna, kaga nsen yawng hpe hka kata de lup kau na matu shakut ai Karai Kasang n re. Shi gaw anhte a myit masin hpe hpaw nna shi hpe madat mara na matu ala nga ai ngwi pyaw simsa ai hte myit galu ai Karai Kasang re. Dai ni aten la nna, na a myit masin hpe hpaw nna, Kawa a nsen hpe hkap la u. Shi tsun na hpa hpe raitim, asan sha madat na matu, bungli law ai aten yawng hta shara jaw u. Shi hte seng nna nang hta san mayu ai ga san ni hpe san nna, shi nang hpe tsun mayu ai hpa hpe raitim, shi hkum tsup hkra tsun dan na hpe kam u.
Daini lani mi gaw tsawra myit rawng ai, sumsing na Kawa hte matut manoi tsun shaga ai lam ni hte hpring nga u ga.
Ya asim sha nga nna sumru yu ga.
1. Karai Kasang tsun ai hpe na lu na matu lu la mai ai lam hpe myit sumru yu u. Shi tsun shaga ai lam yawng hpe myit sumru yu nna, sumsing lamu na Kawa hte ga shaga lu na matu, na a myit masin hpe makam masham hte Chyum Laika hpe jahpring ya na ahkang jaw u.
“Teng man ai Wenyi du sa yang, teng man ai lam yawng mayawng hpe shi nanhte hpe woi awn na ra ai: kaning rai nme law, shi gaw shi a myit hte tsun na n rai, shi na la ai hte maren tsun na ra ai rai nna, du na ra ai lam ni hpe nanhte hpe tsun dan na ra ai.” Yawhan 16:13 hta mu lu ai.
2. Na a wenyi hpe simsa hkra aten la nna Karai Kasang a man e hkam la u. Nang hte ni htep ai lam hpe tsun dan na matu shi hpe hpyi shawn u. Ya aten hta Chyoi Pra ai Wenyi nang hte rau nga nga ai hpe kam sham nga u.
“Nanhte gaw Karai Kasang a nawku htingnu rai nna, Karai Kasang a Wenyi nanhte hta rawng nga ai hpe nanhte n chye nga myit ni?” 1 Korinhtu 3:16 hta mu lu ai.
3. Ndai aten hta Karai Kasang nang hpe shi gara hku hkam sha ai lam tsun dan na matu hpyi nem u. Shi nang hpe chye mayu ai lam yawng hpe tsun dan na matu tsun u. Na a hkam sha lam hta galai shai ai lam ni (sh) na a wenyi hta na lu ai lam ni hpe myit galu let myit maju jung u.
“Ngai hpe shaga e, ngai nang hpe htan ya nna, nang n chye yu ai kaba dik ai hte makoi magap da ai lam ni hpe tsun dan na de ai.” Yeremia 33:3.
Karai Kasang a nsen hpe na lu ai gaw “shinggan de” loi mi na lu tim, chyum laika hte maren sha rai nga ai. Anhte a Karai Kasang gaw hkrung nga ai hte shamu shamawt nga ai. Shi gaw tsan gang nga ai n re ai sha, shi hpe teng sha chye na matu ra sharawng nga ai. Lai wa sai aten na mahkrum madup ni (sh) mungkan a hkam la ai lam ni hta grau nna, Chyum Laika hpe na a tengman ai lam hpe tsun dan na ahkang jaw u. Wenyi lam gaw tsep kawp tengman ai. Karai Kasang nga ai gaw teng sha rai nga ai. Shi anhte a kata e nga ai, tsun shaga ai, lam madun ai, hpaw shadan dan ai, shamai shatsai ya ai, hkye hkrang la ai lam gaw anhte yawng hkap la ai raitim, n hkap la ai raitim, anhte yawng sak hkrung nga ai tengman ai lam rai nga ai. Dai ni Karai Kasang hpe na a myit masin hpe hpaw nna, shi hte grau nna kanawn mazum ai sak hkrung lam de nang hpe lam madun ya na ahkang jaw u. Chyoi Pra ai Wenyi hta nang lu la mai ai hku hkau lam hpring tsup ai hta dai ni sak hkrung nga u. Dai ni Chyoi Pra ai Wenyi a tsawra myit, ni htep ai nsen hpe na a shani tup na lu la u ga.
Shiga madat nga ai ni yawng hpe Chyoi Pra ai Wenyi, Shi a simsa ai chyeju jaw ya nna tut e bau sin nga u ga law!