Daini na Ja Chyum Mungga hpe hti sumru yu ai shaloi e, Sumsing lamu na mungdan gaw du magang ra ai. Machyi makaw hkrum ai ni hpe shamai ya nna, si mat ai ni hpe sharawt dat ya na lam na chye lu ga ai. Ya daini na ja chyum mungga hta e, Sumsing lamu na mungdan gaw du magang ra ai. Ndai Madu a kabu gara shiga hpe hkaw tsun na matu shangun dat ai zawn, Sumsing lamu na mungdan a hkum zup ai lam ni hpe ndai chyum mungga daw sha rai nga ai. Sumsing lamu na mungdan gaw, hpang e byin wa na lam n re. Ya ya nan anhte a lapran hta byin taw nga ai lam nan she rai nga ai.

Anhte ni nta de shang ai shaloi e, wunli lu u ga ngu shakram mu nga nna, Madu Yesu gaw tsun da nga ai. Anhte yawng a wunli nga ai ga si ni, magam bungli ni, galaw sa wa ai sat lawat ni mahkra gaw, tinang kawn shawng hpang nna, galaw sa ra ai re. Shingrai anhte ni tsun shaman ya dat ai wunlu wundan hpring ai tsawra myit hte hpring zup ai ga si ga ngau ni gaw tinang hpang de bai n htang wa ai ngu ai hpe e, moi na jiwoi jiwa ni gaw, kam sham hkap la ma ai re. Ndai (Esaea 55:11) hta, “Ngai a mungga gaw akyu n rawng ai sha, Ngai kaw bai ninghtang wa na n re” nga nna, tsun da ai re. Dai majaw shiga madat nu wa ni yawng hte e, tsawra matsan dum lam hte hpring zup ai ga si ni hpe tsun shaga chye na matu shakut sa ga law.