Daini na Ja Chyum Mungga hpe hti sumru yu ai shaloi e, Ga tsun nga ai ni gaw nanhte n rai, nanhte a kawa a wenyi gaw, nanhte hta e ga tsun nga ai nga ai lam na lu ga ai. Ya daini na chyum mungga daw hku nna, Madu Yesu gaw hka bra nga ai htristan ni a tara lam ni hpe mu mada lu na matu hte, Madu Yesu a hpang hkan ai hkristan prat a hkrun lam hpe shadan shadawng ya ai chyum mungga daw nan rai nga ai. Hkrit tsang ai lam hpe nden ja ai myit a tsam ning ja hte shadang la lu na rai nga ai zawn, kam shut ai zawn re ai myit ni hpe mung kam sham ai myit hte sak hkrung tawt lai na matu, shiga hpe jaw ya nga ai.

Bai yak hkak hkrit hpa lam ni hpe nden ja ai atsam hte awng dang lam lu la ra ai zawn, myit a gawng kya lam ni hpe mung, kam sham ai myit hte sha awng dang lu na rai nga ai, nga nna nanhte a kawa a wenyi gaw, nanhte yawng hpe tsun da nga ai. Madu Yesu gaw shi a Kasa ni a matu, hpa mung n garum ya ai sha sasana magam de dat dat na n rai. Kaja wa sha teng teng ra wa ai shaloi garum ya na nga nna, ga sadi hte a rau sha shi dat dat ai rai nga ai. Dai re ai majaw, hpang jahtum du hkra ngang kang ai ni a matu gaw, hkye hkrang la ai lam lu la na re nga nna, Madu Yesu gaw anhte yawng hpe ga sadi jaw da nga sai re. Ndai lam ni mahkra hpe anhte hkan sa shakut ai rai yang htani htana asak mung teng sha lu la na rai nga ga ai law.