July 5, laban shana maga na Angelus akyu hpyi ai aten hta, Wa Sarabyin Leo XIV gaw, Mahte a Kabu Gara Shiga hpe myit sumru let, ‘Hkristu gaw shinggyim masha ni a tsin-yam tsindam hte n hkru n kaja ai lam ni a mahtai rai nga ai’ ngu ai hpe ahkyak shatai tsun lai wa ai. Shinggyim masha ni a shakut shaja ai lam shagu hta, Yesu gaw myit mada shara hpe la sa ya nga ai hpe kam sham ai ni hpe shadum ya ai: “Mayam prat hta, Hkristu gaw lawt lu ai lam rai nga ai. Majan tsin-yam tsindam lapran hta, Hkristu gaw myit mada shara rai nga ai. Yubak mara galaw ai aten hta, Hkristu gaw mara raw dat ya ai lam rai nga ai.”
Prat a tsam pu gaw grai li ai zawn rai tim, Hkristu gaw dai ni hpe anhte hte rau gun hpai nga ai a majaw loi mi tsang wa ai lam Wa Sarabyin sang lang dan ai. Mara hte nni nkri a majaw hkala nba hkrum ai shinggyim masha ni hpe Shi hkam la nna, Yesu gaw shamai shatsai ya ai, shalan shabran ya ai, hkye hkrang la ai lam hpe jaw ya nga ai. Dai majaw, Wudang gaw sum mat ai kumla n re ai sha, myit mada shara, hkye hkrang la ai lam, jet ai lawt lu lam a npawt nhpang rai nga ai.
Wa Sarabyin Leo gaw, Hkristu a hpang hkan nang ai lam gaw ‘tinang hkum hpe n-gun jaw ai sha nyet kau ai lam n re ai sha, tsin-yam tsindam hpe lachyum, mahtai jaw ya ai lam rai nna, prat labau a nsin sin dik ai aten ni hta pyi nhtoi htoi tu shangun ai lam re, nga nna ahkyak shatai tsun da nga ai. Hkristu a tsin-yam tsindam hte wudang lam hku nna sha, hpang jahtum e n hkru n kaja ai lam hpe dang kau lu na re.
Wa Sarabyin gaw ‘Karai Kasang a hpaji byeng-ya hpe hkam la lu na matu shagrit shanem ai lam madung re’ ngu ai lam hpe mung madi madun da nga ai. Karai Kasang gaw tinang a chye na hkawn hkrang ai lam hpe kam hpa ai gumrawng gumtawng ai ni hpe n re ai sha, shagrit shanem ai ni hte Shi hpe ra kadawn nga ai hpe chye na ai ni hpe Shi hkum shi hpaw shadan dan ai. Karai Kasang a hpaji byeng-ya gaw, shinggyim hkum hkrang hkam la ai shagrit shanem ai lam hta dan dawng wa nna, grau nna, n-gun kya ai, lit li ai ni hpe jaw ya ai lam re, nga nna tsun ai.
Wa Sarabyin Leo gaw, kam sham ai hkristan ni hpe Yesu a saw shaga ai lam hpe hkap la na matu n-gun jaw ai, “myit hki ba ai hte lit li gun ai ni yawng, ngai hpang de sa marit,” ngu ai hpe sang lang dan let, Hkristu a “kandang” hpe hkap la ai gaw, Shi a prat hta tinang hkum hpe jaw ya ai tsawra myit hta shang lawm ai lachyum rai nga ai—Shi a sharin a chyin lam gaw myit mada shara hte a ten galu simsa lam rai nga ai.
