Daini na Ja Chyum Mungga hpe hti sumru yu ai shaloi e, kabu gara shiga hpe myit grit nem ai ni hkap la ma ai lam na chye lu ga ai. Dai ni gaw San pra ai Bonaventure a poi shani rai nga ai. Madu Karai Kasang hpe kaji dik ai ni zawn, shagrit shanem ai myit masin hte sit shang nga ga ai kun? Shing n rai yang tinang dinghkrai chye madat ai a ntsa e, kam hpa shingbyi nga taw ga ai kun? Ndai lam ni hpe san sagawn yu na matu dai ni na chyum mungga hta, anhte yawng hpe saw shaga taw nga ai.

Madu Karai Kasang sharin ya ai teng man ai lam ni hpe jan mau ningtawn ai hpe lu madu da ai a ntsa e, lakap nna chye madat ai hku nre ai sha, Madu Karai Kasang hpe madat mara ai, kam sham ai, ap nawng kam hpa ai hta she madung rai nga ai hpe Madu Yesu daini e ja ja kalang mi bai tsun shadum nga sai. Shingrai kaji dik ai masha ni gaw, Madu Karai Kasang hpe shanhte ra nga ma ai hpe chye hkap la nna, myit masin salum chyinghka hpe shagrit shanem ai hte hpaw malang da nna, shaman chyeju ni hpe hkap la nga ma ai. Dai majaw shiga madat ni yawng hte e, sanseng chyoi pra ai asak prat hkrun lam gaw anhte kade daram chye na ga ai kun ngu ai hta madung n rai, Karai Kasang hte masha a lapran e tsawra myit kade ram matut nga nga lu ai ngu ai kaw sha madung rai nga ai.