Daini na Ja Chyum Mungga hpe hti sum ru yu ai shaloi e,  Sumnung shingdi ai Hkristu a lam na chye la lu ga ai. Daini na Madu a mungga hte e, si mani nna, shagrit shanem ai hte shalan shabran ya ai lam jaw ya lu dik ai ga si ni hpe Madu Yesu tsun shaga nga ai. Magrau grang ai ni, awng dang ai ni, ngamu nga mai ai ni hpe Madu Yesu n shaga ai. Hki ba ai ni, lit li gun nga ai ni hpe sha Madu Yesu shaga nga ai re. Bai hkum hkrang myit masin wenyi gawng kya nna, pu ba nga ai ni hpe ninggun bai ban ya na nga ga sadi jaw da nga ai. Ndai mungkan n jaw lu ai myit kraw kata na simsa lam hpe Madu Yesu gaw jaw ya na nga tsun da sai.

Anhte ni gaw jahkring hkring sha mayak mahkak mang hkang lam ni hpe tinang hkrai dinghkrai kam hpa chye nga ga ai. Tinang hkrai pu ba mat ai shaloi e gaw, Karai Kasang gara kaw re ngu tam sagawn chye wa ai. Karai Kasang gaw anhte a makau e, ru yak shoi hpa lam ni hpe hpai garum na matu jin jin rai nga ai. Shi gaw anhte a mayak mahkak lam ni hpe la kau ya na ga sadi jaw da nga tim, dai mayak lam ni a kata kaw na, ninggun hte myit hta simsa lam hpe jaw ya na ngu ga sadi jaw da ai lam rai nga ai. Ya dai ni anhte marai hkum shagu gun hpai nga ai li la ai ru yak shoi hpa lam ni hpe anhte hpe tut e tsawra nga ai Madu Yesu hte rau jawm hpai sa ai rai yang, teng sha gun hpai loi na re.