Daini na Ja Chyum Mungga hpe hti sumru yu ai shaloi e, Laban Ban ai lam a lachyum hpe na chye lu ga ai. Laban shani a yaw shada ai lam gaw, lit shali ya na matu n rai. Karai Kasang hte arau nga nna, wenyi a matu niggun atsam la let, matsan dum lama chye ai lam hpe grau grau madun lu ai shani hku nna, Karai Kasang gaw lak san kum hpa jaw da ai rai nga ai. Hparishe ni gaw laban shani a rip kawp tara ni hpe sha madung da nna, tara ai lam, matsan dum chye ai lam hte, Karai Kasang hte matut nga ai ngu ai laban shani a lak san namchyim hpe madung da na malap mali rai nga ma ai.

Madu Yesu tsun ai shi ra sharawng ai gaw matsan dum lama ai lam re. Ap nawng ai lam sha n re. Tsawra ai lam matsan dum lama chye ai myit ni n lawm ai, nawku hpung a hkam sa tara ni hpe Karai Kasang n ra sharawng ai. Anhte gaw Karai Kasang hpe tsawra na, tinang hte ni htep ai ni hpe mung tsawra na ngu ai madung lam yan ni hpe malap mali rai nna, kaga yak hkak nga ai masha ni hpe ahkyak n da chye ai myit masa ni hpe Shi n ra sharawng ai. Kaga masha ni hpe mara shagun na lam hta e gaw lawan dik ai hku chye tsun ai hta tsawra matsan dum lam madun dan ai magam lam ni hta grau lawan galaw sa lu ai ni tai nga hkra shakut na matu Karai Kasang anhte yawng hpe ja ja ninggun jaw nga ai law.