Shi hkring sa nga ai Castel Gandolfo mare na Angelus akyu hpyi ai aten hta, Wa Sarabyin Leo XIV gaw ‘Nli gat ai wa a ga shadawn’ hpe myit sumru let, Karai Kasang gaw shi a tsawra myit gaw shinggyim masha ni a gawng kya ai lam hta grau kaba ai majaw, shi a mungga nli gat ai hpe galoi mung n jahkring kau ai hpe ahkyak shatai tsun dan ai.
Wa Sarabyin gaw ‘Yesu Hkristu’ ngu ai hkum shan dagraw la ai Mungga gaw hkye hkrang la ai lam hte wenyi asi law htam wa na matu Kawa gat hkai ai nli tum rai nga ai lam Wa Sarabyin sang lang dan ai. Karai Kasang a mungga gaw kalang lang myit ja ai, myit bra mat ai, ninghkap ai myit masin ni hta hkrat wa ai raitim, tsawra myit hte prat hpe galai shai ya ai shara hta gas au, namhpun kaja ai myit masin ni hpe mung mu lu nga ai.
San Pra ai Yawhan Chrysostom a ga hpe lakap nna, Wa Sarabyin Leo gaw, shinggyim masha ni hkai lu hkai sha ai ni hte n bung ai sha, Karai Kasang gaw, ga sau n rawng ai zawn rai nga ai ga hta pyi, matut nna gat hkai nga ai, hpa majaw nga yang, masha shagu hta makoi magap da ai kaja ai atsam hpe mu lu ai majaw re. Karai Kasang gaw myit masin langai hte langai hpe sung sung chye ai majaw, anhte kadai re ai hpe, makam masham hku nna kadai byin tai wa lu na hpe kam sham ai lam hpe galoi mung n jahkring kau ai.
Karai Kasang a mungga hpe hkap tau hkalum la ai gaw, mungkan ting hkyak hkyak ra kadawn nga ai tsaw ra myit, kabu gara ai, ngwi pyaw ai, myit galu ai, matsan dum ai, mai kaja ai, sadi dung ai, sumnung shing di ai, tinang hkum hpe hkang lu ai ‘Chyoi Pra ai Wenyi a asi ni hpe shabyin ya lu ai lam, kam sham ai hpung masha ni hpe Wa Sarabyin shadum ya nga ai.
Shi a myit sumru ai lam hpe Wa Sarabyin Leo gaw, Hkristan ni hpe, Chyum Laika hti ai, atsin sha nga ai, akyu hpyi ai, myit sumru ai lam ni a matu aten la nna, Karai Kasang a mungga hpe anhte a myit masin hpe nnan bai gram lajang ya lu ai hte, shani shagu na sak hkrung lam hta Kabu Gara Shiga hpe sakse hkam lu na matu hkyen lajang ya lu ai rai nna, anhte a wenyi prat hpe grau sung hkra galaw na matu, Hkristan ni hpe n-gun jaw da nga ai.