Shi a laika buk ‘Disarmed and Disarming: Peace Is a Gift’ hta, Wa Sarabyin Leo XIV gaw, 2025 ning May shata hta Wa Sarabyin tai wa ai hpang, shi a sharin achyin ai lam ni hpe shinggyin la let, Hkristan ni simsa lam hpe shaga la ai lam hpe myit sumru yu lai wa ai.
Teng man ai simsa lam gaw hkrung rawt sai Hkristu kaw nna hpang wa ai rai nna, shi a awng padang gaw zingri zingrat ai lam n re ai sha tsawra myit, sak jaw ap nawng ai lam, mara raw dat kau ai lam ni hku nna lu la ai lam Wa Sarabyin sang lang dan nga ai. Majan ni grai law hkra byin nga ai hte hpyen masa rawt jat wa ai mungkan hta, simsa lam gaw masha shagu a lit rai nna, shani shagu na sak hkrung lam hta matsan dum lama ai lam, mara raw ya ai lam, htinglu htinglai ai lam ni hku nna hpang ra ai ngu shi ahkyak shatai tsun da nga ai.
Wa Sarabyin Leo gaw ‘simsa lam hpe tengman ai lam hta gawgap da ai’ ngu ai hpe ahkyak shatai nna, hpyen n-gun (sh) Nuclear laknak lang nna shimlam hpe madi shadaw ya lu ai ngu ai myit masa hpe ninghkap tsun da ai. De a malai, shi gaw ‘hpring tsup ai simsa lam gaw laknak dawm kau ai hku nna lu la na re’ ngu nna ngang ngang kang kang tsun let, mungkan ting laknak lang gasat gala lam nnan byin wa ai hte hpyen masa hpaji rawt jat wa ai gaw shinggyim masha ni a matu grai kaba ai hkrit tsang hpa byin shangun nga ai ngu sadi jaw nga ai. Shi gaw “never again war” ngu ai npawt tara hpe bai gram lajang na matu tsun shadut nga ai.
Shi gaw ‘masha langai hkrai a akyang lailen nden marai’ a ahkyak ai lam hpe mung madi madun dan ai, Soviet hpyen du Stanislav Petrov gaw, matsun maroi ga ni hpe myi pat nna madat mara ai, shi a myit masin hpe hkan sa ai hku nna, byin mai ai Nuclear majan hpe pat shingdang na matu karum ya ai lam hpe bai myit dum shangun ai. Masha langai a galaw ai lam gaw labau hpe galai shai ya lu ai hpe Wa Sarabyin sadi hkrup nga ai.
Hpang jahtum, Wa Sarabyin Leo gaw, manghkang ni matut manoi byin nga ai raitim, Hkristan ni hte kaja ai myit rawng ai masha yawng hpe myit mada shara nga nga na matu n-gun jaw da nga ai. Shi gaw masha shagu hpe Hkristu a tsawra myit, tinang hkum hpe jaw ya ai tsawra myit, zingri zingrat ai lam n galaw ai, simsa lam hpe tinang a sasana magam hku nna galaw nna, grau tara rap ra ai hte simsa ai mungkan hpe gawgap na matu n-gun n yawm ai sha shakut shaja na matu tsun shadut da nga ai.