Daini na Ja Chyum Mungga hpe hti sumru yu ai shaloi e, Sape tai na wa tinang a hkum hpe ningdang kaw ra ai lam hpe na la lu ga ai. Tsawra ai shiga madat nu wa hpu nau ni e, Madu Yesu a jet ai hpang hkan nang ai masha ni anhte tai mayu ai rai yang, ndai mungkan ga na ra marin na zawn re ai lam ni law law nga nga mali ai re. Dai rung rai ni a ntsa e, ra marin ai myit dut dang nga ai. Bai dai ni kaw chyu sha myit kap nga ai anhte a myit masin ni hpe tawn kau da lu hkra shakut ra ga ai. Ya ndai anhte a makau grup yin ni hta e, masha ni a matu akyu jaw ya ai mai kaja ai magam lam ni law law galaw lu na matu, tinang a hkum hpe nyet kau ra ai lam ni law la nga ai re.

Dai gaw tinang a yaw shada galaw sa mayu ai lam ni hpe tawn kau da ra ai. Ap nawng sa ra ai lam ni nan rai nga ai. Ndai mai kaja ai lam ni hpe galaw ai anhte yawng a matu hkrat sum ai lam n nga ai re. Dai mabyin ni mahkra gaw, anhte a prat hpe jahkum shazup ya nga ai. Anhte hpe jahtum chyalai asak lu la na gaw teng sha rai nga ai. Dai majaw jahkring mi sha lu la na pyaw hpa lam ni hpe myit manoi ai lam n nga ai sha, tinang a prat hpe manu dan nga ai. Bai tut nawng ding grin a nga nga ai  ngwi pyaw ai lam a matu, asak hkrung nga sa ga. Shaloi jang, anhte sak hkrung nga sa ai lam hta manu dan akyu rawng ai prat hte hkawmsa chye na grai ahkyak la nga ai law.