Hkristu gaw shinggyim masha ni a kawsi hpang gara ai lam hpe teng sha jahpring ya ai, nga nna Wa Sarabyin Leo XIV, Laban shani na Angelus mungga hta kam sham ai hpung masha ni hpe tsun ng-gun law lai wa ai.
Muk hte nga ni a lamik kumla hte seng nna, San Mahte ka da ai dai shani na Kabu Gara Shiga hpe myit sumru let, Wa Sarabyin gaw, Yesu gaw, hkam sha lam n nga ai ni a myit masin hpe bai gram lajang ya ai sha n-ga, Shi a law htam ai kumhpa ni hte shinggyim masha ni hpe bau maka ya nga ai hpe madi madun da nga ai.
Kabu Gara Shiga hta, Yesu gaw, shawa masha ni hpe matsan dum ai myit hte, muk manga hte nga lahkawng hte, mau hpa lamik kumla hku nna, masha hkying manga jan hpe jaw sha ai lam hpe tsun dan nga ai.
Wa Sarabyin tsun ai hta, Yesu gaw anhte hpe laksan tsawra myit hte mungkan ga hpe la sa ya ai hkye hkrang la ai lam hpe madun dan ai kumla ni, amu ni hpe galaw lai wa sai lam, myi nmu ai ni hpe myi bai mu shangun ai, na n na ai ni hpe na lu shangun ai lam ni lawm ai hpe bai myit dum shangun ai.
Madu hte hkrum zup ai gaw ‘n-gun jahpring ya ai’ mahkrum madup rai nga ai
Wa Sarabyin gaw, muk law jat wa ai lam hta, Yesu gaw kawsi hpang gara nga ai ni hpe lusha jaw sha ai lam hpe madun dan ai sha n-ga, Madu hte hkrum katut ai lam gaw, shi hkum nan, n-gun jaw ai mahkrum madup langai mi re ai hpe hpaw shadan dan ai lam hpe, kam sham ai ni hpe shadum ya nga ai.
Madu a anhte hpe bau maka ai lam gaw galoi mung n htum n wai ai lam hpe ngang ngang kang kang tsun let, “Hkristu gaw shinggyim masha ni a kawsi hpang gara ai lam, tengman ai lam hte asak hkrung lam a matu anhte a kawsi hpang gara ai lam hpe teng sha shadik ya nga ai” nga nna mung tsun ai.
Myit marin ai myit a ‘wenyi machyi makaw’
Wa Sarabyin Leo gaw, gumhpraw mahkawng da ai hte jahten sharun ai lam ni hta law law lang dan dawng wa nga ai, myit marin ai myit a n hkru n kaja ai lam hpe mung sadi jaw da nga ai.
“Ndai wenyi machyi makaw hkrum ai gaw, sutgan hte nanghpam lu sha ai lam ni hpe n-gun rawng hkra galaw ya ai majaw, kawsi hpang gara ai majaw hkrap nna, hka hpang gara ai majaw hkrap nga ai ni hpe masha ni malap kau shangun ai,” nga nna shi yawn ai hte tsun ai.
“Majan hte gumrawng gumtawng ai lam ni a hkrit hpa ni hpe hkrum katut let, Madu gaw sumsing lamu de mada yu nna, kade daram matsan dum myit hte shaman ya ai, muk tawng ni hpe garan ya nhtawm, sape ni hpe jaw ai, shawa masha ni hpe garan jaw ai hpe myit yu ga,” nga nna Wa Sarabyin tsun shadut da nga ai.
Missa hkungga chyeju hte tsawra myit hta rawt jat galu kaba wa ga
Ndai tsawra myit a lamik kumla hta, Madu gaw anhte a hpunau wa hku nna Shi a asak hpe jaw ya ai Hpang jahtum na Shana Shat Sha Poi hta, anhte a npawt nhpang de wa ai, Yesu a arawn alai galaw ai lam ni hpe anhte chye na la ga ai, nga nna Wa Sarabyin tsun ai.
Shingrai, Wa Sarabyin Leo gaw, kam sham ai ni hpe, Eucharist a chyeju hpe hkam sha ai shaloi, anhte a shani shagu galaw ai lam ni hku nna, dai a tsawm htap ai lam hpe sakse hkam na matu, dinghku masha ni hte jinghku jingyu ni hpe shaman chyeju jaw ya ai kaw nna hpang na matu saw shaga nga ai.
Yesu hta, ra kadawn nga ai htingbu ni hpe karum shingtau yang, hkring sa ai aten ni pyi, hpunau nauna ni a simsa lam a aten ni byin wa chye ai ngu shi hpaji jaw da nga ai.
Hpang jahtum, Wa Sarabyin Leo gaw, kadai mung shanhte a “shani shagu na muk” n lu ai lam n nga hkra, tsawra myit rawng ai Nu Maria kaw garum hpyi ya let, shi mungga hpe hpungdim dat ai.