Daini na Ja Chyum Mungga hpe hti sum ru yu ai shaloi e, shut kataw ai wa hpe sharai ya ra ai lam na chye lu ga ai. Anhte hpe shut ai wa (sh) roi rip ai wa hpe bai matai n htang ai sha, garum shingtau ai hku myit jasat hte galai shai lu hkra, Madu Yesu Hkristu gaw, daini anhte hpe sharin nga sai re. Shingrai prat hta e, lai kyang hta grai n’gun yawm nga ai ni hpe mara raw hkyamsa ya nna, matsan dum chye ai lam madun let, teng sha kup zup ai myit masin hte, gram lajang sharai ya nna galai shai wa na matu, ahkaw ahkang ni hpe gyin shalat ya na lam ni hpe mung myit ja su ya nga ai.

Mt 18:19 hta e ning nga ka da ya ai. Dai gaw “Nanhte hta na marai lahkawng (sh) marai masum pawng nna, shi a matu akyu hpyi ya ai sahloi e Madu Karai Kasang teng sha madat ya na lam tsun da nga ai. Dai majaw n’gun kya ai ni hpe jeyang daw dan ai lam n galaw ai sha, shanhte a matu jawm akyu hpyi ya let, garum shingtau ya nga ga. Dai re majaw, Chyoipra ai wenyi Karai Kasang hpe kam sham kam hpa nna, anhte a prat hta teng man jaw htuk ai magam bungli ni hpe gun hpai galaw sa let, makau grup yin ni a matu mung akyu jaw ya ai magam ni hte, akyu rawng mai kaja ai bungli ni hpe chyu sha, hkan galaw shakut sa ga law. Dai lam gaw Karai Kasang ra sharawng awng ai lam nan re.