Daini na Ja Chyum Mungga hpe hti sumru yu ai shaloi e, lu su ai shabrang ma a lam hpe na chye lu ga ai. Jahtum chyalai a sak hpe lu mayu ai rai yang, hpa baw mai kaja ai a mu ni hpe galaw ra na rai ta? Ngu Shabrang ma wa san ai shaloi, Madu Yesu bai htang ya ai. Dai gaw tara kanu lam ni hpe hkan shatup ra ai hta n ga, hkum zup ai de du na matu gaw, tinang a myit pawt sindawng ai, ra marin lawhpa ai myit, gumrawng gumtawng ai, myit gyip ai, ndai lam mahkra hpe dang shadip kau lu ai. Bai n kaja ai, ra rawng gawng kya ai lam ni hpe kabai dawm kau ra ai.

Tinang a akyu hpe n yu ai sha, yak hkak jam jau hkrum nga ai ni hte arau garan gachyan ya nna, kaga masha ni hpe mung akyu jaw ya lu ai. Matut nna, tsawra matsan dun lanu lahku chye ai myit ni hpe madu nga lu na matu, dai ni na mungga hku lang mi bai shadum ya nga ai. Shingrai lam amyu myu maga hku nna, htenza taw nga sai shingra tara a hpyen, tinggyeng namak lawhpa myit rawng ai ni a arawn alai a majaw hkam sha ra ai mayak jamjau lam ni, dai zawn re ai jam jau lam ni hkam sha ra taw nga ai ni yawng hpe, tsawra myit tawn da let garum shingtau ya ra ga ai. Dai zawn mai kaja ai magam lam ni hta shakut hkawm sa let, hkumzup ai prat a hkrun lam de madung da let, arau sha hkawm sa shakut nga ga law.