Daini na Ja Chyum Mungga hpe hti sum ru yu ai shaloi e, lu su ai wa gaw sumsing mungdan de shang lu na yak la ai lam hpe na chye la lu ga ai. Matsan jam jau ai ngu ai gaw, masha hpe myit ru hkrit kajawng shangun ai. Bai lu su sahti ai lam gaw masha ni a myit hpe grai gang ya lu nga ai hpe anhte dum chye ra ga ai. Dai re majaw hkum zup ai lam hpe hkam sha mayu ai rai yang, tinang kaw nga ai hpe dut kau nna, n lu n lawm ai, matsan mayan re ai masha ni hpe garan jaw na matu  tsun dat ai shaloi e, dai ramma wa gaw, myi man grai n tsawm ai hte shi a nta de wa mat wa ai.

Ndai mabyin lam hpe mu ai Kasa ni gaw, myit shang sha nna, Kasa Petru a ga san a matu tsun sang lang dan ai mahtai hpe lu la ma ai. Shingrai anhte mung Madu Yesu a kasa tai nna, tinang a akyu hpe chyu n myit ai sha, matsan jam jau ai, myit ru shoi hpa hkrum nga ai ni hpe garum shaingtau ya ai wa gaw, ndai prat hta e pyi, htam latsa akyu hkam la lu na gaw teng sha re. Bai tinang a tinggyeng akyu a matu chyu sha asak hkrung nga sa nna, wenyi n hkrat sum u ga, anhte a prat hkrun lam hta e, dinggrin ngwi pyaw simsa ai hku nga sa lu na matu, shani shagu hkawm sa ai lam ni hta, jaw kaja ai lam yan hku nga sa lu hkra, mahkrun lam ni hpe gyin shalat sa ga law.