Daini na Ja Chyum Mungga hpe hti sum ru yu ai shaloi e, Sabyi sun hta a mu galaw ai ni a ga shadawn hpe na chye la lu ga ai. Madu Karai Kasang a Sabyi sun ngu ai gaw, Shi Madu hkum nan lata la nna, ga sadi hkam da let, makawp maga bau sin lanu lahku ya taw nga ai, Madu Karai a kashu kasha ni hpe tsun ai rai nga ai. Ding grin anga nga ai Karai Kasang gaw mai kaja ai wa rai nga ai. Matsan jam jau hkrum nga ai ni, n’gun kya nga ai ni hpe tsawra matsan dum chye ai wa re. Dai sabyi sun hta hpang jahtum du sa wa ai wa hpe sun madu wa rai yang gaw, hpa akyu n hkam la lu na re ngu ai hpe chye chyalu rai ga ai.

Raitim Madu Karai Kasang gaw shinggyim masha ni hpe tsawra ai majaw, yawng hte hpe e, dinggrin ngwi pyaw na lam hpe hkam sha shangun mayu ai re hpe, anhte yawng hpe chye madat shangun mayu ai. Dai gaw, shi Madu a jet ai tsawra myit kaba nan rai nga ai. Masha ni e shingdu tawn da hkrum ai ni, matsan jam jau ai ni, hpang jahtum na masha wa hpe mung, Madu Karai bau sin makawp maga ya nga ai ngu ai hpe anhte sharin hkaja la lu ga ai.