Daini na akyu hpyi sumru yu na ga baw hpe: “God’s relentless pursuit, Karai Kasang gaw anhte hpe nsim nsa hkan tam nga ai,” ngu ga baw hpe la ga.
Shawng nnan Chyum mungga hpe madat la ga,
“Gaja wa, mai kaja ai hte matsan dum lama ai gaw, nye a prat tup ngai kaw hkan nang na ra ai.” Shakawn Kungdawn 23:6.
Anhte a makam masham a npawt nhpang gaw anhte a bungli (sh) anhte a chye na hkawn hkrang ai lam hta gawgap na matu n re, Karai Kasang anhte hpe n sim n sa hkan tam ai lam hta she gaw da nga ai. Anhte hpand madu hte hku hkau jinghku hku ai lam gaw anhte ni shi hpe tam ai majw nre, shi madaw anhte hpe tam ai a majaw she re nga ai. Anhte a prat hta bungli galaw nga ai Hkristan wenyi lam a lam ni anhte a matu si hkam ai Yesu a chye ningsang ni a majaw sha re nga ai. Anhte a makam masham hpe Karai Kasang hta maju jung ai nre sha, anhte a n-gun atsam hta gawgap da ai makam masham re nga yang gaw teng man lam nhpring nga ai the hkrat sum chye ai ning pawt hta gawda ai lam she re nga ai. Dai gaw zaibru jang e gai tawn ai nta hte bung nga ai.
Ehpesu 1:16-18 hta tsun da ai hta, “Ngai mung, nye a akyu hpyi ai hta nanhte hpe adum nga let, nanhte a lam shakawn kungdawn na, n sim n sa rai nga nngai. Anhte a Madu Yesu Hkristu a Karai Kasang ngu ai, hpung shingkan a Kawa gaw, shi hkum nan hpe chye chyang lu mu ga, hpaji byen-ya the shingran shapraw ai Wenyi nanhte hpe jaw ya u ga hte; shi shaga la ai a jaw e myit mada shara gaw gade wa kaba nga ai mung; n taw n tsang ai hpung shingkang rawng ai shi a Sali wunli gaw chyoi pra ai ni hta e gade wa kaba nga ai mung; kam sham nga ai anhte hta e shi a nachying galu kaba htum ai atsam gaw, gade wa galu kaba nga ai mung nanhte chye lu myit nga nna tsun da nga ai.
Karai Kasang a hkan tam ai lam hpe sanlang dik ai hku chye na lu na matu nga yang Pawlu zawn anhte a myit masin a myi hpe htoi tu shangun na matu Karai Kasang hpe hpyi nem ra ai. Chyum Laika laika man ni hpe yu nna, Karai Kasang shi hpe gumlau ai ni hpe hkan tam ai mabyin langai hpang langai hpe mu lu nga ai. Hosea laika buk ting hta, Israela hpe hkan tam nga ai Karai Kasang a myit masin hpe mu lu nga ai. Shi amyu masha ni shi hpe kade wa kabai kau tim Karai Kasang gaw myit daw let kabai kau ai lam nnga ai sha hkan tam nga ai hpe anhte asan sha mu lu nga ai.
Karai Kasang anhte hpe hkan tam ai hkan shaga la ai lam hpe hkum pat lu ai atsam gaw anhte nlu ga. Karai Kasang anhte hpe hkan tam ai hpe pat shindang lu ai kaba dik mara mung nnga ai zawn, shi a man kaw na mung anhte nlu koi yen nga ai. Anhte shangai wa ai aten shani kaw na Karai Kasang gaw anhte nang ngai yawng hpe galoi mung hkan tam nga ai. Karai Wa ai yaw shada lam kaba dik gaw shi rau anhte jinghku hku hkau ai lam sha re nga ai. Na a marai kaba dik sai ngu nna matsam dum lam dik ai Karai Wa a man de bai du shang wa na matu hkum agam nga et. Na mara hpe tawn da kau nna Karai Wa a man de sit shang nga u.
Karai Kasang gaw ya ya jang na a salum jinghka akawt let nang ngai anhhte shi hpe shang hkun ahkang jaw na matu alat nga ai. Anhte gaw Karai Kasang a matu hpa galaw ya lu ai ngu ai hta, Karai Kasang hku nna anhte hpe Shi Karai Kasang wa mi ting anhte rau galoi mung nga nga ai hte Shi Karai Kasang gaw na a matu re hpe chye hkun mayu nga ai. Na a salum mahkra hpe Karai Kasang kaw ap jaw nga u. Shi nang hpe hkan tam nga ai. Akyu hpyi let shi gaw na hpe tsawra nga hpe hkam sha u.
Ya, asim sha nga nna sumru yu,
1. Karai Kasang na a myit masin hpe n sim n sa hkan tam nga ai hpe myit sumru yu u. Chyum Mungga hti sumru let Shi Karai Wa a chyeju ni a ntsa Shi a madu shi madu hte hku hkau lam hpe gawga nga u.
“Na a tsawm htap ai hte tsawra myit gaw nye a prat shani shagu ngai hpe hkan tam nga ai,” nga nna Shakawn Kungdawn 23:6 tsun da nga ai.
2. Kawa Karai hte na a hku hkau lam hpe shi nang hpe hkan tam ai hta kun (sh) bungli hta gawgap da ai kun sumru yu u? Shi a tsawra myit hpe gara kaw na lu la na matu shakut nga ai kun? Nang hpe ningdang kau na (sh) ari jaw na ngu myit nna, na a myit masin a gara daw ni hpe shi kaw na makoi magap da ai kun?
“Kaning rai nme law, makam masham a marang e, chyeju hte sha nanhte hkyehkrang la ai hkrum manit dai: dai gaw nanhte nan galaw ai n rai, kadai mung gumrawng shara n nga u ga, Karai Kasang a kumhpaw kumhpa rai nga ai, ngu nna,” Ehpesu 2:8-9 hta hti lu nga ai.
3. Karai Kasang nang hpe tsawra ai tsawra myit kaba hpe htang ai hku nna na a myit masin mahkra hpe jaw u. Na a myit masin chyinghka hpe shi hpe hpaw nna, nang hpe hpaw shadan dan ai shi a tsawra myit hta hkring sa nga u.
“Yu u, ngai gaw chyinghka akawk let tsap nga nngai: nye a nsen na nna chyinghka hpaw ya ai wa kadai raitimung, ngai shang nna shi hte rau sha na we ai, shi mung ngai hte rau sha na we ai,” nga nna Shingran laika, 3:20 hta tsun da nga ai.
Shakawn Kungdawn 17:8 hta Dawi akyu hpyi ai gaw, “Na a myi shingna zawn ngai hpe sin nga e, Na a singkaw shingnip hta ngai hpe makoi da e” nga ai. Karai Kasang hpe hkan tam ai lam gaw, nang gaw shi a myi man a n-gup re ngu ai tengman ai lam hta gawgap da u ga. Shi a kaba dik ai shingnip kata e nang hpe makoi da ai tengman ai lam hta na a shim lum lam gaw npawt nhpang tawn da u ga. Karai Kasang nang hpe hkan tam ai hpe galoi mung n jahkring kau na re ngu ai hta, dai ni na aten hta na a myit masin simsa lam, kabu gara lam, hpring tsup lam lu la u ga.
Shiga madat nga ai ni yawng hpe Chyoi Pra ai Wenyi, Shi a simsa ai chyeju jaw ya nna tut e bau sin nga u ga law!