Daini na akyu hpyi sumru yu na ga baw hpe: “Made for Relationship, Karai Wa rau Jinghku hku ai hku hkau lam a matu hpand da hkrum ai,” ngu nna la ga.
Shawng nnan Chyum mungga hpe madat la ga,
“Ngai gaw Karai Kasang rai nga ai hpe chye na na myit masin shanhte hpe jaw na nngai, shanhte gaw nye a amyu masha ni tai nna, ngai gaw shanhte a Karai Kasang tai na mara ai: kaning rai nme law, shanhte gaw shanhte a myit masin mahkra hte ngai hpang de nhtang wa na mara ai nga ” Yeremia 24:7 hta ka da nga ai.
Anhte gaw sumsing Lamu Kawa hte hku hkau lam nga na matu hpan da hkrum ai ni re nga ai. Dai lam hpe anhte gaw sung sung a dum ra nga ai. Shi hterau hku hkau ai lam ai matu hpang da hkrum ai ngu ai hpe mahta nna anhte gaw kadai ni re ai ngu hpe mung, anhte galaw sa ai lam shagu hpe lachyum hpaw ra ga ai. De a lachyum gaw anhte nga sa sak hkrung nga ai, hkam sha ai, myit ai, sawn ai lam yawng gaw anhte gaw shi hterau hku hkau let nga na matu hpang da hkrum ai ngu ai hta gawgap da ra nga ga ai. Ndai lam gaw anhte yawng a matu kada dik htum ai lam re nga ai.
Ngai a prat ai madung hku nna shut ai lam hpe madung shatai let hkawn sa lai wa sai. Ngai gaw mungkan a awngdam lam ni, masha laga ni e shawn shagrau ai lam, ngai kadai re ai ngai ni hpe lu galaw ai ngu hta gawgap let prat hpe gaw de sa wa kau ni ai. Ndai lam ni yawng hta ngai hpa bai mu lu ai kun nga jan gaw, myit dawhten hpa ni, pu ba ai lam ni, hkrum tsup ai ngu nhkam sha ai lam ni rau sha hpring chyat taw ai hpe mu lu nga ai. Anhte ni yawng gaw Hkristan ni chye nga hkra re tim, mungkan a jut masa ni nna anhte a prat hpe gawgap na matu agun alau hpe hkrum chye nga ai.
Raitim mung Shiga magat nga ai ni e, Karai Kasang hterau re yang gaw laklai shai nga ai. Shi hpang madu Karai Kasang hterau hku hkau ai lam hta re jang gaw anhte ni shai ai prat masa nam chyim hpe hkam sha lu na re nga ga. Yeremia 24:7 hta “Ngai Karai Kasang rai nga ai hpe chye lu na myit masin shanhte hpe jaw na nngai, shanhte gaw nye a amyu tai nna, ngai gaw shanhte a Karai Kasang tai na nngai, kaning rai nme law, shanhte gaw shanhte a myit masin mahkra hte ngai hpang de nhtang wa na mara ai” nga nna tsun da nga ai. Anhte langai hte langai a kata hta Karai Kasang a amyu ngu ai anhte a masat dingsat hpe npawt nhpang tawn da mayu ai myit nga ai. Anhte a Karai Kasang gaw teng sha nga ai, chye na mai ai, anhte hpe tsawra ai, shi a makau grup yin hta anhte gaw asak hkrung na matu hpan da hkrum ga ai.
Nang gaw aten shagu hta Karai Kasang a tsawra myit hpe chye chyang ai hte asak hkrung na matu hpan da hkrum ai. Sumsing lamu na nanhte a Kawa gaw mai kaja ai hpe chyam yu nna mu lu na matu nanhte hpe hpan da ai. Nang hpe Hpan Madu hte tut nawng kanawn mazum nga lu na matu hpan da hkrum ai the aten shagu shi a shingnip npu e jawmpawng nga na matu re nga ai. Karai Kasang gaw na a matu asak re nga ai. Shi gaw nang hpe tsawra ai. Bai nna, na a myit masin ting shi a n’rai shi yang, shi n’hkring sa na re. Karai Kasang a tsawra myit gaw teng sha na matu re nga ai.
Dai ni Karai Kasang hpe na a myit masin salum hpe jaw u. Shi hte hku hkau lam hpe madung tawn nna, na a prat hpe madung tawn u. Shi a n sim n sa tsawra myit hte sadi dung ai lam hta ru jung nga u. Na a makam masham a npawt nhpang hte hkum tsup ai wa hpe nang mada yu nga ai shaloi, na a prat gaw htani htana galai shai wa u ga (Hebre 12:2).
Ya, asim sha nga nna myit sumru yu ga,
1. Karai Kasang hte hku hkau lam a matu nang hpe hpan da ai ngu ai tengman ai lam hpe myit sumru u. Karai Kasang a tsawra myit hta na a prat hpe madung tawn mayu ai myit hpe Chyum Laika gaw shalaw shabyin ya na ahkang jaw u.
“Ngai gaw Karai Kasang rai nga ai hpe chye na na myit masin shanhte hpe jaw na nngai, shanhte gaw nye a amyu masha ni tai nna, ngai gaw shanhte a Karai Kasang tai na mara ai: kaning rai nme law, shanhte gaw shanhte a myit masin mahkra hte ngai hpang de nhtang wa na mara ai nga nna ,” Yeremia 24:7 hta ka da nga ai.
2. Sumsing lamu Kawa hte hku hkau lam hta grau nna nang hpa hpe manu shadan nga ai kun? Nang na n-gun yawng hpe hpa hta jai lang nga ai kun? Teng sha nang ra sharawng dik ai gaw hpa rai ta?
3. Karai Kasang hte hku hkau lam hta grau nna nang manu shadan ai lam yawng hpe tsun dan u. Shi a myit masin gaw mara shagun na matu n re ai sha, lawt lu shangun nna law htam ai asak jaw na matu re ai hpe chye nga u. Shi nang hpe grau nna kabu gara lu na lam hte shi nang hpe jaw ya ai asak hpe shingran hte jahpring ya na hpe shi ra sharawng nga ai.
Kalang lang anhte gaw Mungkan hpe hpang da ai Karai Kasan hta grau nna hpang da hkrum ai mungka a madu hpe anhte hkan tam galaw nga ga ai. Bai she dinglik yu yang, mungkan ga gaw myit ndik ai lam the n hkru n kaja ai lam ni the she hpring chyat nga ai shara she re nga ai.Karai Kasang chyu sha myit dik ya lu ai ra hpe sutgan, awng dang lam ni hku nna jahpring shakut nga ga ai anhte ni gaw. Sumsing lamu de azi yu dat u, shaloi anhte nang ngai tam ai myit dik myit pyaw lam shi dai Shi hpang madu Karai Kasang kaw na sha lu la mai ai lam mu la lu na re. Chym laika hpe hta la na hti sumru yu let, na prat a matu gara gaw ahkyak dik htum re hpe daw dan nna hkawm sa nga u. Na myit mada lam hpe galoi mung ngalai shai ai Karai Kasang a htani hta ni kumhtaw hta gawda nga u. Tsawra matsam dum chye ai Karai Kasang wa hta na a ngwi pyaw simsa ai hpe lu la hkra shakut nga u. Shiga madat nga ai ni yawng hpe Chyoi Pra ai Wenyi, Shi a simsa ai chyeju jaw ya nna tut e bau sin nga u ga law!