Kahtawlik Nawku Hpung Manmaw Saradaw Ginwang a lit hkam Sagurem wa, Wa Saradaw Raymond Sumlut Gam gaw Manmaw kaw na Myitkyina de hpyen yen taw nga ai hpyen yen Zinlum Lakawn Dat Kasa ni hte hkrum shaga n’gun jaw ai lam hpe ( 14 August 2026 ) ya shani Myitkyina San Columban Cathedral Nawku Jawng wang na, San Thomas Gawknu hta Wa Saradaw hte rau Manmaw Karuna Director Wa Jau Luke Hpa Shan Lum, Wa Saradaw a laksan amu madu Wa Jau Laurence Jangma La Nu hte Wa Jau Francis Maran Awng Seng Naw ni hkrum shaga lai wa ai.
Dai shani na Wa Saradaw a n’gun jaw mungga hta hpyen yen jam jau taw ai anhte hkrai n re, Universal Church re majaw du ai shara hta nawku hpung hte matut mahkai nga nna seng ang ai Saradaw Sasana, jau ginwang na Wa Saradaw, Wa Jau ni hte Sara ni woi awn ai hku hkan sa na matu matsun ya ai, ra ai lam shagu Wa Jau ni, Sara ni hpe n hkrit n gaya ai sha, tang madun hpyi lajin mai ai lam matsun n’gun jaw ai. Wa Jau ni, Sara ni hte hkau chyap hkra nga na hpe n’gun jaw ai. Nawku jawng lung ai shara hta laban alu bang na mung, madat mara hkan sa na matu mung, garum hpyi na matu mung, ahkaw ahkang lu mai ai lam tsun n’gun jaw ai.
Gara de na du ai hpyen yen raitim Saradaw Sasana Karuna rung hte matut mahkai garum hpyi yang garum ya na teng sha re. Tinang Sasana Saradaw ginwang hte mung matut mahkai rai nna jawm garum mai ai lam, yak hkak ai aten hta Karai Kasang hpe sha kam sham, akyu hpyi let nga sa ra ai lam, ningsin lai jang, ninghtoi bai du na re nga nna mung tsun n’gun jaw ai.
Hpyen yen dat kasa ni a hkam sha lam;
Wa Saradaw hpe hpyen yen ni a hkam sha lam ni hpaw tsun dan lu ai majaw myit kraw hta asan sha nga hkam sha lu ai. Wa Saradaw hte Wa Jau ni n’gun jaw ai mungga gaw myit n’gun hpe mung grai jat ya nga ai.
Wa Saradaw hte Wa Jau ni aten jaw ahkyak la nna hkrum shaga matsun ninggun jaw ya ai majaw grai kabu n’gun lu ai. Karai Kasang hpe chyeju dum ai, Wa Saradaw hte wa jau ni mung chyeju dum ai. Wa Sarabyin hte nan hkrum nna Myanmar Mungdan ting a matu tang madun ya sai lam, Wa Sarabyin hkum nan akyu hpyi ya sai majaw kabu myit dik lu ai, Wenyi n’gun lu la ai.
Wa Saradaw hkum nan hpyen yen ai raitim sinpraw, sinna, dingdung, dingda chyam bra nga ai hpyen yen hpung masha ni hpe kawan katsan, n’gun jaw, mai byin ai daram garum ya ai hpe na lu, mu lu, chye lu ai majaw kabu myit pyaw ai hte chyeju dum ai.
Wa Saradaw hte hkrum zup lu ai majaw myit kaji garen nga ai lam ni hkyamsa ai hte shim lum lam lu ai ngu hkam sha ai. Hpyen yen ladaw na wa nna machyu shingbyi shara yak wa ai raitim hpyen yen shara hte seng nna, seng ai sasana ginwang up Wa Saradaw, Wa Jau ni hpe garum hpyi shana ya na hte Karuna hte matut mahkai nna alu madu ni hpe hpyi lajin ai kaw hkrak sha, madi shadaw ya na lam n’gun jaw ai majaw grai n’gun lu ai.
Dum nta buga hte sutgan ni hpe shamat kau ai rai tim, makam masham galoi n shamat kau ga nga nna tsun shadum n’gun jaw ai hpe myit kraw hta matsing la lu ai. Wa Saradaw shaman ya ai hpe hkam la lu ai majaw mung grai kabu myit pyaw ai. Shara shagu hkan nga ai, nam maling hkan machyu nga ai hpyen yen hpu nau ni yawng hpe mung myit dum let akyu hpyi ya nga ai.
Manmaw kaw 2024 ning December shata hta byin hpang wa ai majan a majaw Manmaw Saradaw Sasana kaw na hpung masha ni gaw Sinpraw, Sinna, Dingdung, Dingda de hpyen koi yen hprawng hkawm nga ai rai nna Myitkyina kaw mung Manmaw Saradaw Ginwang na Kahtawlik hpung masha htinggaw ( 300 ) jan, hpung masha marai (1600 ) jan nga ai lam chye lu ai.
