Wa Sarabyin Leo XIV gaw August 19 shani na general audience hta ‘Sacrosanctum Concilium’ ngu ai ga baw hte seng nna, ‘nawku daw jau ai lam hta chyoi pra ai mahkawn mangoi lam’ hpe madung tawn nna, shi a hkaw tsun hkaw tsun ai lam hpe matut galaw lai wa ai. Chyoi pra ai mahkawn mangoi gaw mawn sumli ai lam sha n rai, ‘nawku daw jau ai lam a ahkyak ai daw langai mi’ rai nna, masha ni akyu hpyi na matu, makam masham hpe tsun shapraw na matu, chyoi pra ai lam hta rawt jat galu kaba wa na matu karum ya ai lam re ngu nna ahkyak shatai tsun shalawm lai wa ai.
Wa Sarabyin ahkyak ai lam nkau mi hpe madi madun da ai
Chyoi pra ai mahkawn mangoi gaw Karai Kasang hpe shakawn shagrau nna, kam sham ai ni hpe chyoi pra shangun ai. Mahkawn mangoi hte shangwi shapyaw ai lam gaw Karai Kasang hpe myit masin hpaw ya nna, masha ni hpe myit rawt ai the myit lawm hkum lawm shang lawm lu hkra karum ya nga ai.
Music gaw communion hpe shabyin ya ai. Kam sham ai ni rau mahkawn hkawn ai shaloi, n bung ai lam ni hpe tawt lai lu nna, shanhte a kahkyin gumdin lam gaw, Nawku hpung langai hku nna, dan dawng ai kumla tai wa ai.
Chyoi pra ai mahkawn ni gaw nawku daw jau ai lam hta htap htuk ai mahkawn ni rai ra ai. Fashion (sh) tinang ra sharawng ai lam ni hpe madung tawn nna lam madun ai hta grau nna, arawng lu ai, asan sha, tsawm htap ai, chye na loi ai, nawku daw jau ai aten langai ngai hte htap htuk ai mahkawn ni rai ra ai.
Chyum Laika hte Nawku hpung a htunghking gaw nawku daw jau ai mahkawn ni hpe shabyin ya ra ai. Laika buk ni gaw Chyoi Pra ai Chyum Laika, nawku daw jau laika buk ni, Nawku hpung a wenyi htunghking ni hte sung htum ai hte grai ni htep ai hku matut mahkai ai rai ra ai.
Gregorian mahkawn hpe manu shadan ai lam naw nga ai, Nawku hpung gaw htunghking amyu myu a mahkawn mangoi htunghking ni hpe mung tara shang htunghking jet ai lam a daw langai hku nna hkap tau la nga ai.
Music quality hte sha n mai byin ai. Liturgical music gaw, htung lailen a ga si, hkrang bung sumla, arawn alai, yaw shada lam ni hpe mung hkungga ra ai.
Formation gaw ahkyak nga ai. Seminary jawng lung ai ni, nawku hpung masha ni, choir hpung ni, mahkawn hkawn ai ni gaw, mahkawn hte nawku daw jau ai lam ni hpe atsawm sha sharin hkam la ra ai.
Wa Sarabyin Leo, St. Antioch mare na Ignatius gaw Nawku hpung hpe mahkawn hpung langai hku nna hkrang shapraw dan ai, Hkristan ni hpe myit hkrum kahkyin gumdin let nga pra na matu hte Yesu Hkristu hku nna Karai Kasang hpe “nsen langai hte sha mahkawn hkawn na matu” n-gun jaw ai.
Chyoi pra ai mahkawn mangoi gaw Nawku hpung ting hpe rau akyu hpyi lu na matu, Karai Kasang hte hkrum lu na matu, makam masham hpe tsun shapraw lu na matu, kahkyin gumdin lam hte chyoi pra ai lam hta rawt jat galu kaba wa lu na matu karum ya ra ai, shi a jahtum na yaw shada lam gaw Karai Kasang a hpung shingkang hpe shagrau sha-a na matu rai nga ai.
