Daini na Ja Chyum Mungga hpe hti sum ru yu ai shaloi e, laika ai sara ni hte Hparishe ni hpe Yesu mara shagun ai lam na chye lu ga ai. Dai ni namungga hta e, Madu Yesu gaw, kaja jahpai hpai ai u hpung na ningbaw ningla ni a myit kata n san seng nga ai mabyin hpe madi madun ya sai lam mu mada la lu nga ai. Anhte a prat hta e, masha shagu hpe hkrang galaw ya ai myi man, tsun shaga ai lam, galaw sa ai lai ladat ni gaw, anhte myit kraw kata hta san seng ai, tsawm htap ai lam ni hte bung pre nga ai kun? Shing n rai yang e, kata kaw amyu mi, bai shinggang kaw gaw amyu mi byin taw nga ai kun ngu ai hpe jep dinglik yu na matu, ndai chyum mungga gaw, anhte hpe sadi jaw nga ai rai nga ai. Dai majaw anhte a myit kraw kata kaw magaw taw nga ai. Tinang a shut ai mara hpe makoi magap na matu shakut taw nga ai myit, kaga masha ni hpe mara n lu raw ya ai myit nga nna, myit ru tsam pu re myit gaw, masha hpe grai myit kahtet puba shangun nga ai re. Dai majaw anhte ni a myit kraw kata hta e simsa ngwi pyaw nga nna, tsawm htap ai madang kaw tawn da lu hkra shakut shaja let Karai kaw na chyeju atsam ni hpe hpyi la nga ga law.