Daini na Ja Chyum Mungga hpe hti sumru yu ai shaloi e, mahkawn marai shi a ga shadawn hpe na lu ga ai. Ndai chyum mungga daw gaw, Madu Karai du sa wa na hpe tau nau lajang shajin sa na lam hte jin jin rai nga ra na ga ai. Ndai shayi mahkawn ni gaw, nawku hpung kata na hpung masha ni hte shingdaw da ai rai nga ai. Dai kaw e, hpaji rawng ai shayi hkawn jet marai manga gaw, Chyoipra ai wenyi hpe tinang lam madun ya ai shagan kaba hku nna, hkap la let, Madu a mungga ngu ai SAU hpe kyem da ai ni rai nga ai majaw, Madu Yesu hte aten dep lu hkrum ai ni rai nga ma ai. Bai SAU shajan n lawm sa ai shayi marai manga hte gaw, ndai mungkan ga na maru mayak shoi hpa lam ni hta sha myit dun nga nna, dai myit shuk lam hta chyu lup taw nga ma ai. Shanhte gaw, wenyi a hkrun lam ni hte tsan gang nga ai majaw mung Madu Yesu hte n lu hkrum kau nga ma ai. Dai re majaw anhte a shani shagu na sak hkrung nga pra sa ai aten ni hta e, tut nawng sadi maja let wenyi lam yan a matu, mai kaja ai lam ni hpe tut hka ja nna, Madu a mungga lam hta asak hkrung nga lu na matu tsun shadum ya ai rai nga ai.

Dai ni gaw San Pra ai Augustine a poi shani mung rai nga ai. Shing rai ndai San pra ai Augustine mying hpe la da ni yawng hpe, kabu pyaw ai poi shani rai u ga ngu a kyu hpyi ya let, shakram dat lu ga ai law.