Daini na Ja Chyum Mungga hpe hti sumru yu ai shaloi e, Nazaret mare masha ni Yesu hpe n hkap la ma ai lam na la lu ga ai. Nawku htingnu kata hta Madu Yesu hti dan ai mungga gaw, hkum hkrang a lam, shinggyim masha ni hte kanawn mazum lam hte seng ai gyit hkang da ai lam, wanglu wang lang lam n re ai. Wenyi hkrun lam hte seng ai myit masin salum shagrit shanem ai ni a lam, makam masham lam ni hte ningpawt gaw da ai hpe mu mada lu ga ai. Hkye la Madu du sa na aten hta, myit hkiba hkrum nga ai salum ni hpe tsi shamai ya na lam, tengman ai lam ni hpe n mu chye ai myi ni hpe bai mu lu na lam, chyoipra ai wenyi Karai Kasang gaw, anhte a nyan marai myi hpe jahpaw ya nna, anhte ni hte ni htep ai ni a ra kadawn ai lam mahkra hpe mu chye lu na lam ni hpe e, myihtoi Helsha a tau nau hkaw tsun da ai chyum mungga rai nga ai. Shingrai anhte ni a prat hta nga sa lam, tsun shaga kanawn mazum lam, hkaw tsun gat hkai lam ni gaw, myit masin hta matsan mayan rai nga ai ni, rim shareng da hkrum ai ni a matu, lawt lu na lam jaw ya na shiga ni rai nga ai hpe tsun shadum ya nga ai.