ANHTE A HKAM LA AI LAM DE N GAYIN MAT AI SHA HKRISTU HPE MYIT MASIN SALAUM HPAW YA NGA GA
anhte a prat hte mungkan hpe galai shai wa hkra Yesu hte langai hkrai a hku hkau lam hpe gawgap nna shani shagu bai gram lajang ra ai, nga nna Wa Sarabyin Leo XIV gaw August 23, Laban shani na shi a Angelus mungga hta tsun da nga ai.
“Anhte a kam sham ai lam hte nawku htung hte seng ai tengman ai lam ni de n htang wa na matu shakut ga, Hkristu hte tengman ai hku hkau lam hpe hpaw tawn da na matu shakut ga,” nga nna zuphpawng nga ai masha law law hpe tsun shaga madi madun lai wa ai.
“Kalang lang, Hkristan makam masham hte seng nna, anhte ‘na’ ai lam sha, masha law malawng myit mada ai lam (sh) anhte hpe ap jaw da ai lam ni, kaja dik ai yaw shada lam ni hte sha myit dik chye ai” nga nna tsun ai.
“Raitim, Yesu gaw anhte hpe langai hkrai a mahtai jaw na matu, shi hpe grau chye na na matu hte, galoi mung hkrum katut ai lam nnan hku nna, shi hte hku hkau lam, ahte hkum anhte hkrang shapraw na matu ahkang jaw na matu shaga nga ai.”
Yawng hpe chye sai ngu myit la ai gunglau lam hpe tawt lai lu ai
Wa Sarabyin Leo XIV gaw, Mahte a kabu kagra hpe myit sumru nga ai shaloi, Yesu gaw shi a sape ni hpe “Nanhte mahtang gaw ngai hpe kadai re ai ngu myit la myit ta?”
Wa Sarabyin gaw, “ndai gaw prat shagu na sape ni a matu, anhte langai hte langai a matu madung ga san langai mi rai nga ai,” ngu nna ahkyak shatai tsun shalawm da ai, makam masham gaw Hkristu a Kabu Gara Shiga hpe matut manoi bai sawk sagawn ra ai lam langai mi rai nga ai, dai hku nna “anhte a prat hta lata la ai lam ni hpe bai gram lajang na matu, anhte tsun shaga ai lam ni hte maren sha rai na matu” re.
“Ndai hku nna, yawng hpe chye sai ngu myit la ai gunglau lam hpe dang manga kau lu nna, makam masham hpe arawn alai langai sha hku nna shayawm kau lu na re” nga nna Wa Sarabyin tsun shalawm da nga ai.
Tinang hkum tinang hte Nawku hpung kata hta n chye ai lam nnan ni hpe hkan sa ai
Hkristu hte shani shagu hku hkau lam hpe bai gram lajang ai gaw “n chye ai lam ni hpe hkan sa na matu mung, anhte myit mada da ai hte n bung ai hku lata la na matu mung tsun shadut ya lu ai” nga nna Wa Sarabyin sang lang dan let, “ndai lam gaw anhte a hkum hkrang hkrun lam a matu mung, Nawku hpung a hkrun lam a matu mung teng ai” ngu ai hte anhte a “sagu rem lata ai lam ni a matu mung teng nga ai” ngu tsun sang lang dan ai.
“Anhte galoi mung galaw wa ai zawn sha matut galaw ai rai yang ram sai” ngu myit ai gunglau lam hpe koi gam na matu sadi jaw nna, ndai ga san ni hpe tinang hkum tinang san na matu n-gun jaw wa ai: “Ngai a matu Madu gaw kadai rai ta?Ngai shi hpe teng sha chye ai kun?Dai ni shi a Kabu Gara Shiga ngai hpe hpa hpyi shawn nga ai kun?Gara lahkam, gara lata la na matu ngai hpe shaga la ai kun?”
Anhte a shani shagu na prat hta tsawra myit hpe la sa ya ai Hkristu hpe mu tam ai
Wa Sarabyin gaw, Yesu gaw anhte a matu kadai re ai, anhte a prat hta shi hpa hpe malai tai ya ai ngu ai hte seng ai ndai ga san ni gaw, “akyu hpyi ai shaloi, Kabu Gara Shiga hpe myit sumru ai shaloi, grau nna pru wa ai” ngu ai hpe madi madun dan ai.
Raitim, Wa Sarabyin gaw, “hpunau nauna ni a hkala nba ni hte ra kadawn ai lam ni hpe hkrum katut ai shaloi, anhte a myit masin hpe grau sung ai hku chyam dinglik ai hku hkau lam ni hte masa lam ni hta mung” byin pru wa ai hpe Wa Sarabyin myit sumru yu nga ai.
“Anhte a shani shagu na sak hkrung lam hta, kadun ai hku tsun ga nga yang, Madu Yesu gaw anhte a matu labau hta lawm ai masha kaba langai mi sha rai nna, ahkyak ai lam ni hpe tsun shaga ai, galaw ai wa rai kun, shing nrai, Kawa a tsawra myit de anhte hpe woi shang wa nna, anhte a prat hte anhte nga pra nga ai mungkan hpe galai shai ya na matu shangun dat ai Karai Kasang a Hkristu rai kun, ngu ai hpe anhte mu tam lu na re” nga nna Wa Sarabyin matut tsun ai.
