Daini na akyu hpyi sumru yu na ga baw hpe: “An open Heart, Na a Salum hpe hpaw da u,” ngu ai ga baw hpe la ga.
Shawng nnan Chyum mungga hpe madat la ga, “Na a myit masin hpe sadi maja nga u, dai hta na asak hka hpawk ni lwi pru wa ai nga nna”Ga Shagawp 4:23 hta tsun da nga ai.
Karai Kasang anhte a matu lajang da ya ai asak hkrung lam a hkum tsup ai lam yawng hpe hkam sha lu na matu myit masin hpaw let asak hkrung ra ai. Kalang lang, hkala nba kaw rai tim, n kaja ai sharin achyin ai lam kaw na rai tim, dai aten ni hta anhte gaw shingdu de pat da nna, tinang hkum hpe sha myit maju jung ai hku nga nga ga ai. Anhte gaw anhte a myit masin hpe bunghku ni hte shinggrup da nna, Karai Kasang hte ni htep ai lam a tengman ai lam hpe aten langai hpang langai hkam la lu na matu anhte hkum anhte ahkang jaw grai shau ga ai. Raitim Karai Kasang gaw anhte hpe grau sung ai de sit na hku shaga nga ai. Shi hte hkrum katut ai prat masa de anhte hpe shaga nga ai. Anhte gawgap da ai bunghku ni hpe jahten kau nna, simsa lam, kabu gara lam ni hpe shabyin ya na hpe kam hpa na matu shi anhte hpe saw shaga nga ai.
Yawhan 15:4 hta “ngai hta noi nga mu, ngai mung nanhte hta noi nga na, lakung lakying gaw tsabyi ru hta n noi yang gaw shi hkrai shi asi n si lu ai hte maren, nanhte mung ngai hta n noi nga yang gaw asi n si lu na myit dai” nga nna tsun da nga ai. Karai Kasang gaw nang hte rau nga mayu ai. Shi gaw nang hpe ga shaga na, lam madun na, shi a tsawra myit hpe nang ntsa e ru jaw na, na a shani tup nang hte rau nga na hpe ra sharawng nga ai. Shi gaw Laban shani na Karai Kasang sha n rai nga ai. Shi a nga nga ai lam gaw, zuphpawng kaba ni, nawku daw jau ai lamang ni, nawku htingnu ni hta sha n’nga ai. Shi gaw aten shagu e nga ai Karai Kasang rai nga ai. Shi gaw htani htana prat a Madu rai nga ai. Bai nna, shi gaw nang hpe kaja ai kumhpa ni hpe aten shagu jaw mayu ai. Shi gaw nang hta mau hpa, asak jaw ai asi si na hpe ra sharawng nga ai. Rai ti mung nanhte gaw shi hta nga nga na matu myit rawng ra nga ga ai. Shi jaw ra ai lam yawng hpe nang hkam la ra ai.
Ga Shagawp 4:23 hta “Na a myit masin hpe maja nga u, dai kaw na asak hka hpawk ni lwi pru nga ai” nga nna tsun da nga ai. Asak gaw hkum hkrang hte wenyi lahkawng yan hta na myit masin kaw nna pru wa ai. Salum gaw hkum hkrang ting de sai hpe shapraw ya ai zawn, na a salum mung wenyi asak hpe shapraw ya ai. Na a salum gaw Karai Kasang tut nawng tsun shaga nga ai shara rai nga ai. Shi gaw na a salum hpe galoi mung lanu lahku ya nga ai re. Shi hpe chye na na matu na a myit masin (sh) kaja ai magam bungli ni a matu na a lata hpe jaw ai hte sha nram ai; shi gaw nang salum yawng hpe she ra sharwang nga ai. Shi na a prat hpe shi a salum the shinggrup da mayu nga ai.
Dai ni aten la nna, tsawra myit rawng ai sumsing Kawa hpe na a salum hpe hpaw dan u. Na a salum grup yin hta nang gawgap da ai bunghku ni hpe tam yu u. Karai Kasang a tsawra myit hpe aten langai hpang langai hkam sha lu hkra pat shingdang kau ya lu ai masu hkalem ai lam (sh) shut shai ai ningmu ni hpe kam sham ai lam hpe jahkring kau u. Nang hpe Karai Kasang gaw lawt lu lam the asak nnan hte jahpring ya nga u ga.
Ya, asim sha nga nna sumru yu ga,
1. Karai Kasang hpe tinang a salum jinghka hpaw let shi a matsun ni chyeju ni hpe hkap madat ahkyak ai lam hpe myit sumru yu u.
“Na a myit masin hpe sadi maja nga u, dai hta na asak hka hpawk ni lwi pru wa ai nga ai ngu,” Ga Shagawp 4:23 hta ka da nga ai.
2. Nang hte Karai Kasang lapran bunghku ni nga ai kun? Shi nang hte rau n’nga ai zawn kalang lang nang asak hkrung nga ai kun? Nang gaw na a shani tup hta Karai Kasang a lam ni hpe hkum tsup hkra hpaw nna hkap la nga ai kun?
3. Yesu a lagaw nhpang e nang gawgap da ai bunghku ni hpe jahkrat kau nna, shi hpe na a myit masin salum hpe hpaw ya u. Shi hte ni htep na matu hpaw shadan dan ai lam hpe hkam la nna, shi a man e hkring sa na matu aten jaw u. Dai ni shi nang hpe jaw ya ai kaja ai kumhpa yawng hpe mu chye lu ai myi jaw na matu hpyi nem u.
Karai Kasang gaw anhte hpe tut nawng shaman ya nga ai. Shi kaw anhte hpe jaw na matu kaja ai kumhpa ni hpe shi hta ayan na nga ai. Yaku 1:17 hta “Kaja ai kumhpa nlang hte hte hkum tsup ai kumhpa nlang hte gaw, ntsa de na yu hkrat wa ai rai nna, nhtoi ni a Kawa kaw nna yu hkrat wa ai rai nna, shi hta galai shai ai lam n nga ai, shingnip shingna mung n nga ai” nga nna tsun da nga ai. Karai Kasang gaw nanhte hpe kaja ai hte hkum tsup ai kumhpa ni jaw let shi a tsawra myit hpe madun dan mayu nga ai. Karai Kasang a shaman chyeju ni hpe mu chye lu ai myi, hkap la chye ai myit the na prat hpe gaw gap nga u. Shi nang hpe lajang ya nga ai lam yawng hpe tam nna shi hpe chyeju dum nga u. Na shani tup hpe kaja ai lam mahkra gaw shi madu kaw hkam la ai re hpe dum nna, Shi madu gaw nanghte ani sha nga nga ai hpe dum na a prat hpe dai myit the gawgap da u.
Shiga madat nga ai ni yawng hpe Chyoi Pra ai Wenyi, Shi a simsa ai chyeju jaw ya nna tut e bau sin nga u ga law!
