All Saints’ Day Homily (Year B )
Hkristu hta tsawra ai nu/ wa hpu nau ni e, ndai laban gaw “Sanpra ai ni hpe shagrau ai poi nhtoi” rai nga ai. Sanpra ai ni ngu ai shaloi sumsing mungdan hta du shang ai ni yawng hpe tsun ai rai nga ai. Dai Sanpra ai masha ni gaw anhte chye ai ni mung lawm na, anhte n chye ai sanpra ai ni mung lawm na rai nga ai. Shanhte ni yawng gaw Mungkan ga kaw nga lai wa sai ni hkrai rai nga ai. Dai majaw anhte shingyim masha ni byin tai wa gaw sanpra ni tai na matu, sanpra ni byin wa na matu rai nga ai hpe dai ni na Sanpra ai ni a poi galaw ai a marang e, anhte hpe shadum ya nga ai. Dai ni nang ngai, sanpra a mashai ni tai na matu ra sharawng ai kun? Sanpra masha ni tai na matu shahkut nga ai kun? ndai Dai na la lu na Mathew laika (5:1-12) gaw Sanpra masha tai na matu Madu Yesu jaw da ai alu ai tara lam (8) rai nga ai. Myit masin hta matsan mayan ai ni; myit sumnung ai ni; yawn hkyen hkrum ai ni; dinghpring ai hte krawsi hpang gara ai ni; matsan dum chye ai ni; myit san seng ai ni; ngwi pyaw sim sa ai hpe shabyin ai ni; dingman ai lam a majaw, zingri zingrat hkrum ai ni gaw alu ai masha ni rai nga ai. Shanhte ni yawng gaw sumsing mungdan de du shang lu na rai nga ai. Shanhte ni yawng gaw sanpra ai masha ni tai na rai nga ai. Dai Sanpra ai uhpung hta shang lawm lu na matu gaw anhte shinggyim masha ni a bandung rai nga ai.
Short Story
Kalang mi hta “Interview” ga san san ai langai mi, grai mying kaba ai Franch sumrai ka ai sara “Leon Bloy” hpe ga san langai mi san ai. Shi a ga san gaw “anhte ni a prat hta yawn ai lam ajet, hkrat sum ai lam ajet hte yawn hkyen mabyin lam ajet nga ai hpe anhte ni kam ga ai. Dai lam hpe sara hku na hpa hpaw ni rai ai ngu myit la, shadu la ai i?” ngu ai ga san rai nga ai. Leon Bloy gaw shi hpe “Anhte ni prat hta yawn ai lam ajet; hkrat sum ai lam ajet hte yawn hkyen mabyin ajet ni gaw Sanpra masha n lu tai ai lam rai nga ai – The only real sadness, the only real failure, the only real tragedy in life, is not to become a saint.” ngu nna shi a ga san hpe htai lai wa sai rai nga ai. Dai majaw anhte ni yawng yawn ai lam ajet kaw nna, hkrat sum lam ajet kaw nna, lawt lu na matu sanpra ai masha tai hkra shakut ra ai. Sanpra masha tai na matu Madu Karai Kasang gaw anhte hpe mungga hku nna lam amyu myu, ladat amyu myu jaw da sai rai nga ai. Dai hta n-ga anhte hpe garum ya na matu sanpra ni hpe anhte hpe jaw da ai. Anhte ni a prat hta hkrat sum ai lam ni, yak hkrat ai lam ni law law hkum ai shaloi ningun la na matu Sanpra masha ni law law nga ai rai nga ai. Anhte ni kasi la na, ningun lu na matu Sanpra masha ni gaw kaning re ai masha ni ngu ai hpe lam (II) hku nna myit yu mai nga ai.
Main Themes:
(I) Sanpra ai ni gaw Karai Kasang a mungga hpe grai mahkung ai, hkungga ai (adore) ni rai nga ai (All the saints adore the word of God). Karai Kasang hte shi a mungga hpe n mai garan ai. Hpa majaw nga yang mungga gaw anhte shinggyim masha ni hpe, Karai Kasang jaw ai kaba dik htum ai kumhpa rai nga ai. Karai Kasang jaw ai kumhpa hpe hkap la nna, shi a mungga hku asak hkrung hkawm sa ai lam gaw sanpra masha tai na matu ningpawt rai nga ai. Dai munnga hpe Sanpra ai masha ni chye ai majaw dai mungga hte maren hkan sa ai rai nga ai. Dai mungga hpe hti myit sum ru ai a marang e, shanhte hpe Karai Kasang shaga la ai yaw shada ai lam ni hpe shanhte chye wa ai. Karai Kasang a yaw shada lam hpe shanhte chye wa ai majaw shanhte a prat hpe nden ja ai myit hte ap nawng gwi ai rai nga ai. Shanhte a prat hpe gwi gwi ap nawng let, sumsing mungdan a chying hka hpe hpaw ai ni rai nga ai. Anhte ni yawng mung Karai Kasang a mungga hpe Missa hkungga hku nna madat hkam la nga ai;
(II) Sanpra ai masha ni gaw Wudang lam hpe ra sharawng ai masha ni rai nga ai (All saints love the way of the Cross). Madu Yesu a lam hpe shaga ai shaloi Wudang lam n lawm yang nhkum ntsup ai zawn sanpra masha ni a lam tsun ai shaloi mung shanhte hpai lai wa ai wudang; shanhte hkrum katut ai mayak mahkak ni hpe tsun yang she hkum tsup na rai nga ai. Hpa majaw nga yang, shanhte ni yawng gaw Madu Yesu a Wudang lam hpe hkansa hkan nang ai ni rai nga ai majaw rai nga ai. Wudang lam gaw shanhte hpe sanpra ai masha byin tai shangun ai hpe shanhte chye ai majaw wudang lam hpe shanhte tsawra ai rai nga ai. Shanhte gun hpai ra ai wudang hpe ruyak jam jau ai lam ngu nna n-myit ai sha, shanhte gun hpai ai wudang hpe Karai Kasang kaw nawng ya lu ai hkungga hku nna myit la, hkam la rai nga ai. Wudang lam gaw Madu Yesu nawng ya ai Kawari hkungga hta shang lawm lu ai ahkaw ahkang langai mi rai nga ai ngu nna shanhte mu ai rai nga ai. Wudang lam gaw shanhte hpe Madu Yesu hte bung wa shangun lu ai lam a ningpawt rai nga ai ngu nna shanhte hkap la ai rai nga ai. Dai majaw yak hkak jam jau hkrum ai shaloi, Karai Kasang gaw shanhte hte a ni sha nga taw nga ai hpe kam let, wudang lam hpe prat htum hkra gun hpai lai wa sai masha ni rai nga ai. Dai majaw anhte yak hkrat jam jau lam ni hkum wa ai shaloi, sanpra ai masha ni zawn myit la, hkam la let, anhte hpai ra ai wudang hpe kangka ai hte gun hpai lu na matu shakut ra ai hpe Sanpra ai ni a poi nhtoi hta anhte hpe bai shadum ya nga ai.
Conclusion
Hpang jahtum hku nna, anhte yawng gaw sanpra ai a uhpung hta shang lawm lu na matu shakut taw nga ai masha ni rai nga ga ai. Karai Kasang shaga da ai hte maren prat tup kangka ai hte hkawm sa ai gaw ahkyak ai. Karai Kasang lata san da ai magam bungli galaw na matu anhte hpe shaga la ai rai nga ai. Dai magam bungli galaw ai shaloi yak hkak jam jau ai ngu ai wudang hpe anhte ni teng sha hkum na rai nga ai. Raitimung, “Nye a chyeju gaw na a matu ram nga ai” ngu nna San Paulu Corithian hpung masha ni kaw shangun dat ai laika lahkawng (12: 9) hta anhte hpe ningun jaw da ai rai nga ai. ndai bat anhte na la lu ai Madu Yesu a alu ai tara lam (8) gaw anhte hpe sanpra ni a hpung hta shang lawm lu na matu lamu ga sumla (map) hte matsun madun ai lam ni (directives) rai nga ai. Dai lamu ga sumla hku hkawm sa rai yang, dai Madu Yesu matsun madun ai lam hku hkan sa ai rai yang tengsha Sanpra ni a uhpung hta shang lawm wa lu na rai nga ai hpe ndai bat na mungga hku na anhte hpe shadum ya nga ai.
Akyu hpyi saga oh hpan madu karai kasang e chyeju mahakra matu chyeju dum ai hte nang wa hpe grau nna kam sham tsawra chyechyang lu ai hte nang wa a kabu gara shiga hpe anhte a sak hkrung lam hta hkaw tsun sak se hkam lu na matu ra kadawn nga ai myit yan marai hte n gun atsam chyeju ni hpe mung jaw ya rit anhte a madu hkristu a marang e hpyi nyem nga ga ai. Amen.
