75. Nawku hpung a htunghking gaw, htawt sit bu hkawm ai ni a matu hte shanhte hte rau bungli galaw ai lam hpe matut manoi galaw nga ai rai nna, dai ni ndai magam bungli hpe tsinyam hkrum ai ni hpe hkap hkalum la ai shara ni, jarit mayan ni hpe Caritas Internationalis hte kaga wuhpung wuhpawng ni a shakut shaja ai lam masing ni hta dan dawng nga ai. Ndai ga sadi hpe dai ni na aten na sharin achyin ai lam gaw asan sha bai madi shadaw ya nga ai. Wa Sarabyin Francis gaw, Nawku hpung a sasana magam gaw, htawt sit nga ai ni hte tsinyam hkrum ai ni hpe grau dam lada ai hku galaw ai lam hpe bai myit dum let, “dai aten na htawt sit ai lam a majaw byin pru wa ai mayak mahkak ni hpe anhte a mahtai hpe ga si mali hku nna shingdaw mai ai: hkap tau hkalum la ai, makawp maga ai, n-gun jaw ai hte rau hpawng de ai.
Nawku hpung gaw shanhte ni hpe hkap tau la, makawp maga, n-gun jaw, hpawng de shangun ra ai.” Shi gaw ndai hku mung tsun ai: “Shinggyim masha shagu gaw Karai Kasang a kasha ni rai nga ai!Shi mung ngai mung Hkristu a hkum hkrang hpe dagraw nga ga ai!Anhte hkum nan mu ra ai, dai hpang kaga ni mung mu lu hkra galaw ra ai, htawt sit ai ni hte tsinyam hkrum ni gaw hparan ra ai manghkang langai sha n-ga, anhte hkap tau la na, hkungga lara ai hte tsawra myit grau jaw ra ai hpunau nauna ni rai nga ai. tara rap ra ai shinggyim wuhpawng, grau hkum tsup ai democracy, grau kahkyin gumdin ai mungdan, hpunau nauna mungkan hte grau hpaw tsun shaga ai hte kabu gara shiga hkaw tsun ai Hkristan wuhpung wuhpawng ni hpe lu la na re.” Nawku hpung gaw, kanu zawn, hkawm sa nga ai ni hpang hkan nang nga ai. Mungkan gaw jahkrit shama ai lam ni hpe mu ai shara hta, nawku hpung ma ni hpe mu ai; bunghku ni hpe gawgap ai shara hta, shi gaw mahkrai ni hpe gawgap nga ai. Shi hkaw tsun ai Kabu Gara Shiga hpe, hku hkau lam hte hkap tau hkalum la ai lam ni hpe madun dan ai shaloi she kam mai ai lam hpe shi chye nga ai. Bai nna, ningdang kau hkrum ai htawt sit masha shagu hta, buga hpung a chyinghka hpe akawk ai gaw Hkristu shi nan re ai hpe shi chye nga ai.
Anhte hta na kaji dik htum wa a makau hta
76. Hkristan a chyoi pra ai lam gaw shinggyim masha ni a malap kau hkrum ai, hkala nba hkrum dik ai shara ni hta law law lang rawt jat galu kaba wa nga ai. Matsan masha ni hta na matsan dik htum ai ni — arung arai ni sha n-ga, nsen n lu shapraw ai ni hte shanhte a sari sadang hpe chye na ya ai lam n lu ai ni gaw Karai Kasang a myit masin hta laksan shara lu ma ai. Shanhte gaw Kabu Gara Shiga a tsawra ai ni, sumsing sali wunli hkam la ai ni rai ma ai (cf. Lk 6:20). Shanhte hta she Hkristu matut nna nni nkri hkrum ai hte bai hkrung rawt wa ai. Shanhte hta she, Nawku hpung gaw shi a tengman dik htum ai hkum hkrang hpe madun dan na matu shi a shaga la ai lam hpe bai mu tam la lu nga ai.