Daini na Ja Chyum Mungga hpe hti sum ru yu ai shaloi e, Simon a kani hte machyi ai ni hpe Yesu shamai ya ai lam hte nawku jawng ni hta Yesu Mungga hkaw hkawm ai lam ni hpe na la lu ga ai. Daini na mungga hta Madu Yesu a tsi lajang ya ai hpe asan sha mu mada lu nga ai. Simon a kani hpe tsi shamai ya ai. Bai shana maga jan shang wa ai ten hta, machyi masha ni hte ana ahkya amyu myu kap nga ai ni hpe shamai ya ai. Dai sha n-ga Nat kap ai ni hpe mung nat hkyawk kau ya ai. Shingrai dai myu kaw nga ai mare masha ni gaw, Madu Yesu hpe shanhte hte rau sha nga nga shangun mayu ma ai.

Raitim Madu Yesu gaw, Kawa karai Kasang a myit ra ai hkan shatup sa na matu, kaga myu mare kahtawng ni hkan sa hkaw tsun na ra nga ai lam tsun da nga ai. Shiga madat nu wa ni anhte yawng hte mung, Madu Yesu a kabu gara shiga hkaw tsun gat hkai na matu, Madu Yesu zawn tsi shamai ai lam galaw na hpe Madu Yesu ra sharawng nga ai. Dai majaw, shara mi kaw chyu n nga ai sha, mungkan shara shagu de hkawm sa nna, Madu Yesu a kabu gara shiga ni hpe hkaw tsun gat hkai sa nga ga. Dai gaw shi Madu ra sharawng ai lam nan rai nga ai.