Castel Gandolfo hta, galaw ai Laban shani na Angelus mungga hta Wa Sarabyin gaw, dai shani na Kabu Gara Shiga hta Yesu gaw, Shi a du wa na tsin-yam tsindam, si hkrung si htan hte hkrung rawt ai lam a makoi magap da ai lam hpe sape ni hpe tsun dan ai lam hpe la kap nna tsun shadum, n-gun jaw lai wa ai.
Shinggyim shingra tara
Wa Sarabyin gaw, Madu tsun ai lam gaw, awng padang lu ai hte n-gun ja ai Meshia hpe myit mada ai lam hte grai tsan gang nga ai, shi a karum shingtau lam hte shanhte a hpyen ni hpe dang kau lu na re, Petru gaw shi a myit n hkrum ai lam hpe gara hku tsun dan nna, mau hpa hte myit daw myit hten ai hte Yesu hpe mara shagun ai lam hpe, ndai hku tsun ai: “‘Karai Kasang gaw ndai lam hpe nang hta galoi mung n byin u ga, Madu e!’” ngu tsun ai.
Ndai lam gaw anhte a shinggyim shingra tara hpe myit yu shangun ai lam re ngu Wa Sarabyin hpaji jaw da nga ai.
“Anhte a matu mung, Karai Kasang a lam ni hpe chye na na matu hte hkap la na matu galoi mung n loi ai, anhte a myit mang lam ni hte grai tsan ai shaloi” grau nna yak ai.
“Madu gaw shut ai wa re ngu myit la na matu, shing nrai, grau sawng ai gaw, Shi anhte a ga hpe n madat ya ai (sh) anhte hpe n myit tsang ya ai” ngu myit la chye ga ai, makam masham a myit sawn sumru ai lam yawng hpe ninghkap nna, gunglau lam byin pru wa ai shaloi chye na hkap la ai lam shut wa chye ai.
San Petru gaw ahkyak ai lam ni hpe sharin ya nga ai
Ndai n teng n man ai lam hpe hkrum katut ai shaloi, Petru gaw shi a myit n-gun n rawng ai lam hta pyi, ahkyak ai lam lahkawng hpe sharin ya nga ai hpe Wa Sarabyin madi madun dan nga ai.
“Langai ngu na gaw, dai zawn re ai aten ni hta pyi, Madu hte bawngban ai lam hpe galoi mung n jahkring kau na matu re” nga nna tsun ai.
De a malai, “Shi anhte hpe hpyi shawn ai lam hpe chye na na matu anhte yak hkak ai lam hpe Shi hpe kam hpa myit hte tsun dan na matu anhte tang shawn, hpyi nem ra ga ai.”
Lahkawng ngu na gaw, “Karai Kasang a magam bungli hpe galoi mung n jeyang ai sha, anhte myit mada ai hte n htap htuk ai aten hta pyi, Shi galaw ai lam ni hku nna anhte hpe hpaw shadan dan nga ai hpe shagrit shanem let akyu hpyi let madat mara na matu re” nga ai.
Yesu gaw, Petru hpe “Satan e, nye a hpang de pru mat wa u!” ngu ai hte shi hte kaga sape ni hpe, tinang hkum hpe nyet kau nna, wudang hpai let, Shi hpang hkan nang ra ai lam hpe sang lang dan let, kam sham ai ni hpe “Petru dai hku sha galaw na ra ai” ngu ai hpe madi madun dan ai.
“Shi a ga madat ngut ai hpang, Petru gaw, dai chyam dinglik ai lam hpe hkap la nna, shi a Hkyela Madu ngu masat da ai Hkristu a ga hpe, shi a prat tup, si hkam ai aten du hkra, sadi dung let nga nga ai re” nga nna Wa Sarabyin tsun ai.
Chyeju hpring ai Kanu Maria gaw wudang lagaw kaw du hkra shi a Kasha hpe madat mara ai
Shingrai, Wa Sarabyin gaw, “anhte mung, anhte a makam masham prat hta mung, akyu hpyi ai hta mung, Petru zawn, myit masin n-gun n rawng ai aten hta pyi, anhte teng sha hkam sha ai lam ni hpe shagrit shanem let Yesu hpe tsun dan lu na matu” Madu hpe hpyi nem na matu, kam sham ai ni hpe saw shaga nga ai. “Dai aten hta sha, anhte myit mada ai hta jan nna, Yesu anhte hpe hpyi shawn ai hpe hkap la ai hta, Petru a madat mara ai myit hpe anhte mung shalat la ga,” nga nna matut tsun ai.
Wa Sarabyin Leo gaw, “Kasha Yesu a wudang lagaw hta du hkra Karai Kasang a masing ni hpe madat mara nga ai” Chyoi Pra ai Nu Maria hpe anhte a kasi ningli hte anhte hpe karum ya na matu akyu hpyi ya let shi a mungga hpe hpung dim dat ai.