Daini na Ja Chyum Mungga hpe hti sumru yu ai shaloi e, Simon hpe Yesu shaga la ai lam na lu ga ai. Nga rim jaubu wa rai nga ai Simon hpe Madu Yesu gaw, shi a sumgawn hpe Hka sung ai de jahkrat shangun ai majaw, Nga law law wa hpe lu rim la ma ai. Dai hpang Simon, Yaku hte Yawhan ni hpe shaga la nna, masha ni hpe hkan hkwi na lit hpe jaw wu ai. Shingrai Kasa ni mung madu a mungga hpe Nga shat zawn sung lang nna, masha ni hpe Madu Yesu kaw woi sa wa ma ai. Dai kaw nna, Nawku hpung gaw chyam bra hpang wa ai rai nga ai.

Ya dai ni anhte hpe mung Madu Yesu gaw mungga hpe hkaw tsun gat hkai sa na matu, bai Shi Madu tsun matsun hpe madat hkan sa na matu, Madu Yesu hpe kam hpa na matu ya ya nan saw shaga nga ai. Anhte ni tinang a hkum hpe kam hpa nna, byin wa ai mang hkang lam hpe hparan sa ai shaloi e, awng dang lam lu la na n re. Hpa majaw nga yang e, mayak mang hkang lam hte shana na htat la ai ningsing hpe hparang ya lu ai gaw, Ninghtoi a Madu Yesu nan rai nga ai. Shingrai shiga madat nu wa ni yawng hte e, shani shagu na, manghkang lam ni hpe Madu Yesu hte hparan lu yang sha, awng dang lam lu la na teng sha rai nga ga ai law.