Myitkyina Jau Ginwang kata 2025-2026 Hpaji ladaw hta G-12 (Tsang 12) awng da sai Kahtawlik Ramma ni a Ningmu Jahpaw Ningja Jat Sharin Hpawng (Level Up Youth Camp) hpe August 27 – August 30 ya shani du hkra 4 ya tup Myitkyina St. Thomas’s Hall hta awng dang ai hte galaw lai wa sai.
Ndai sharin hpawng hpe tsang 12 awng da sai Ramma ni shada grau chye chyang hku hkau wa lu na matu, Ramma ni makam masham lam grau chye chyang wa lu na matu hte shawnglam a matu chye da ging ai hpaji nli ni hpe hkam la lu na matu yaw shada let galaw lai wa ai lam Myitkyina Jau Ginwang Ramma ningbaw Shd. Jerome Sut Myu Mai tsun ai.
“No Communication, no work. No Communication, no leadership ngu ai hte maren dai ni na Ramma ni shada da matut mahkai ai lam, shada da gahkyin gumdin ai lam grai ahkyak nga ai. Ningbaw ningla kaja langai byin na matu gaw Communication grai ahkyak ai. Madu Yesu gaw de da ai nawku hpung ngu gaw langai sha nga ai. Dai gaw Kahtawlik Nawku hpung rai nga ai. Dai hpe hpa hte mung nmai galai kau ai.” Nga nna Myitkyina Ginwang Up Wa Jau Msgr. Dr. Peter Hka Awng Tu kaw nna Ramma ni hpe ninggun jaw mungga shaga lai wa sai,
Ndai Ramma sharin hpawng hta Fr. Kurt Zion Pala kaw nna “Five Pathways to your future”, Sara Anthony Ah Brang kaw nna “လူငယ်နှင့်ဆက်ကပ်ခြင်း”, Msgr. Dr. Peter Hka Awng Tu kaw nna “Leadership and Communication”, Sara Peter Matsaw kaw nna “Catholic Social Teaching”, Sara John Paul kaw nna “Who Am I?” hte Saranum Dr. Veronica Nangzing Lu Awn kaw nna “Education” hte seng ai lam ni hpe garan gachyan ya lai wa sai.
“Moi gaw nawku hpung hta ap nawng ai lam ngu ai hpe atsawm nchye na lai wa ai. Raitim ndai sharin hpawng a marang e, ap nawng ai ngu gaw kade a matu nre sha tinang a matu sha re lam hpe asan sha chye na la lu ai. Ramma magam bungli hta shanglawm ap nawng ai a marang e masha law law hte kanawn mazum lu na, shara shagu de du hkawm lu na, bai nna shaman chyeju a majaw prat shawnglam hta awng dang ai lam masha hta grau hkam la lu na re ngu ai lam ni hpe chye na la lu nngai. Ndai zawn woi awn galaw ya sai ni yawng hpe mung grai chyeju dum ai” nga nna G-12 hpe 6D (Distinction) hte ningtawn ai hku awng dang da lu sai Shd. John Nhkum Myu Jet kawn tsun lai wa sai.
Ndai ramma sharin hpawng hta Myitkyina Jau ginwang kaw nna Ramma ni sha n’ga kaga jau ginwang hkan na ramma ni yawng (30) jan sa du shang lawm lai wa sai. Shani shagu Missa hkungga nawng jau ai lam, Rosary hti ai lam, Social Game ginsup ai lam, Creative Activity lamang ni mung galaw lai wa ai.
