Daini na Ja Chyum Mungga hpe hti sumru yu ai shaloi e, laban ninghtoi hte seng ai lam hpe chye la lu ga ai. Makam masham uhpung shagu ni hta e, laban shani hkan sa ra ai tara ni nga nga mali ai re. Ndai laban nawku daw jau ai wenyi lam yan hta shakut sa ai a akyu chyeju gaw, hkam sha yu sai ni yawng chye nga ga ai. Bai kaja ai masha ni yawng hte mung, alu ap nawng ai magam lam hta kabu pyaw nga ma ai re. Yesu gaw laban shani hta e, lata katsing si ai wa hpe shamai ya ai majaw, Hparishe ni gaw, pawt nga ma ai.

 Dai zawn sha ndai mungkan ntsa hta e, mai kaja ai magam galaw ai shaloi mi rai rai, bai n hkru n kaja ai lam galaw ai shaloi mi rai rai, tsun jahpyak na masha ni gaw, galoi e mung nga nga na gaw teng sha rai nga ai. Raitimung Madu Yesu zawn sha mai kaja ai magam lam ni hpe dangdi dangdep ai made ap nawng galaw shakut sa let, asak hkye la ai magam hta galaw gun hpai sa ga. Ahkyak ai gaw madu a shani shagu na sak hkrung hkawm sa ai lam hta, htani htana asak a matu mai kaja ai lam hta hkawm sa nga na gaw grai nan ra ahkyak la nga ai n rai a ni?