Yesu gaw sape ni hpe shi hpe masha ni a lata de ap kau na ngu tsun ai shaloi shanhte n chye na ma ai. Hpa majaw rai? Hpa majaw nga yang, dai aten hta Yesu gaw pai maga de, hkra maga de mauhpa amu galaw nga ai. Bai nna, ndai mau hpa masha hpe ahkaw ahkang lu ai ni a lata de ap kau nna, dai hpang tsin-yam tsindam hkrum na gaw gara hku byin wa na kun ngu ai hpe shanhte hkum shanhte san nga ma ai rai na re.

Sape ni gaw Shi a sasana magam hpe atsawm n chye ai majaw malap mali rai nga ma ai. N rai yang, shanhte chye ai rai yang, Yesu a ndai tau hkrau tsun ai lam hpe chye na na re. Yesu a hpang hkan na matu dawdan ai aten hta anhte hkrum sha ra ai tsin-yam tsindam ni a matu anhte hkum anhte hkyen lajang ra ga ai.

Hpa majaw nga yang, Madu hte sape tai ai lam hpe nni nkri ni hte n mai garan ginhka ai majaw rai nga ai. Yesu hpang hkan nang na matu gaw tsin-yam tsindam hpe mung hkap la na matu re. Raitim, Yesu hpe asan sha hkan nang yang, manghkang n nga ai prat hpe lu la na re ngu tsun na masha ni nga na re. Ndai lam gaw tengman ai lam hte tsan dik htum rai nga ai, hpa majaw nga yang, Yesu a hpang teng sha hkan nang ai anhte shagu gaw, tsin-yam tsindam, nni nkri ni hpe hkrum sha ra na re.

Raitim ndai tsin-yam tsindam ni hpe myit nna anhte hkum anhte jam jau n jaw ga hpa majaw nga yang Yesu gaw anhte n lu hkam sharang ai chyam dinglik lam ni hpe n jaw na re. Anhte gaw Yesu hpe kam sham ra ai sha rai nna, dai gaw anhte a nni nkri ni hpe dang manga lu na matu grau law nga ai.