September praw 2 ya shani galaw ai General Audience hta, Wa Sarabyin Leo XIV gaw, Nawku hpung a dai ni na mungkan hte matut mahkai lam hpe tsun dan ai, Vatican Zuphpawng II a “Gaudium et Spes (“Kabu Gara Lam hte Myit Mada Lam”) hte seng nna, sharin shaga lai wa ai.
Nawku hpung gaw, daini na mungkan a tengman ai lam ni hpe, grau nna, manghkang, n tara ai lam, zingri zingrat ai lam, hpaji masa lawan ai hku galai shai wa ai, shinggyim nga pra masa n teng n man ai aten hta, myit n lawm ai sha, myit mada ai lam n nga sha n mai nga ai lam hpe ahkyak shatai tsun shalawm da nga ai. Hkristan ni gaw masha ni a ga hpe atsawm sha madat ya nna, shanhte a hkam sha lam ni hpe chye na ya nna, shinggyim wuhpawng a manghkang ni hta atsam rawng ai hku shang lawm na matu shaga la hkrum ai ni rai nga ai. Hkristu hte Chyoi pra ai Wenyi a atsam hte kam sham ai ni gaw kaga masha ni a lit hpe garan jaw ya ra ai, grau nna matsan mayan, garan ginhka ai, n tara ai, zingri zingrat ai lam ni hkrum sha nga ai ni hpe makawp maga karum shingtau ya ra ai.
Wa Sarabyin gaw, Hkristan ni hpe dai ni na shinggyim wuhpawng ni a nhtan shai ai lam ni hpe chye na nna, hpaw shadan dan na matu mung tsun shadut da nga ai. Shinggyim masha ni gaw hpaji masa hta rawt jat galu kaba wa lu sai, sutgan ni hpe grai law hkra mahkawng da lu sai, shinggyim wuhpawng hte seng nna grau nna chye chyang wa sai. Raitim, masha law law gaw kawsi hpang gara ai hte matsan mayan hkrum nga ai. Dai hte maren, masha ni gaw, ndai mungkan a htawm hpang prat hpe jahkrit shama nga ai hpe chye na tim, law law lang, tinang hkum hpe sha myit ai, tinang a matu sha jai lang ai lam ni hpe matut galaw nga ma ai. Shinggyim masha ni simsa lam hpe ra sharawng ai raitim, kalang lang majan hpe dai hpe lu la na matu kaja dik ai ladat langai hku nna naw sawn la nga ma ai.
Wa Sarabyin Leo a matu, ndai nhtan shai ai lam ni gaw, Nawku hpung gaw shinggyim masha ni hte hpa majaw ni htep hkra nga ra ai hpe madun dan nga ai. Nawku hpung gaw masha ni a sung htum ai ga san ni hte myit mada lam ni hpe madat ya nna, shinggyim labau a madung hte yaw shada ai lam rai nga ai Yesu Hkristu hpang de woi sa na matu shaga la hkrum nga ga ai.
Gaudium et Spes, hpe myit sumru yu let, Hkristu gaw shinggyim masha tai wa nna, anhte a prat hta shang lawm ai zawn, Nawku hpung mung daini na masha ni a kabu gara ai lam, myit mada ai lam, tsin-yam tsindam hkrum ai lam, myit ru myit tsang ai lam ni hpe hkam la lu na matu shaga la hkrum ai lam Wa Sarabyin sang lang dan nga ai. Ndai lam gaw grau nna matsan mayan hkrum nga ai ni hte tsin-yam tsindam hkrum nga ai ni a matu grau nna ahkyak nga ai. Nawku hpung gaw, “ten a kumla ni hpe” matut manoi mada, hti nna, Kabu Gara Shiga a nhtoi hta lachyum shapraw ra ai, tengman ai lam hpe sakse hkam nna shinggyim masha ni hpe daw jau ai Hkristu a sasana magam hpe matut galaw sa wa ra ai.
Matsan masha ni hpe yu lanu lahku ai lam gaw shinggyim wuhpawng (sh) mung masa lit langai sha n rai, makam masham hte grai matut mahkai nga ai lam hpe Wa Sarabyin Leo madi madun da nga ai. Hkristan ni gaw matsan mayan masha ni hta Hkristu hpe tam mu, shanhte a ga madat mara, shanhte a sari sadang hpe makawp maga, shanhte hta ra kadawn ai lam ni hpe tsun shaga nan, shanhte hku nna Karai Kasang hpaw shadan dan ai hpaji byeng-ya hpe sharin la na matu shaga la hkrum ai lam re.
Shi gaw, “kabu gara ai hte myit mada shara” (Gaudium et Spes) gaw, daini na aten na masha ni hte matut mahkai nga ai, ra kadawn dik ai ni hpe daw jau ai, Kabu Gara Shiga hpe nden marai hte hkaw tsun sakse hkam ai Nawku hpung a arawn alai hpe shabyin ya nga ai ngu ai myit mada lam hpe tsun dan let shi a mungga hpe hpungdim dat ai.