Daini na Ja Chyum Mungga hpe hti sum ru yu ai shaloi e, wunli lu na ni hte dingnye hkrum na ni a lam hpe na chye lu ga ai. Ya daini hti ang ai Madu a mungga gaw, Madu Karai kaw na shaman chyeju wunli hkam la lu ai gaw, grai nan ahkyak ai lam re hpe, anhte hpe sharin ya nga ai. Madu Karai a galai shai ya lu ai shi a hpung shing kang hpe mu mada lu nga ai. Mungkan ga na masha ni n ra sharawng ai lam ni hpe Madu Karai Kasang gaw, chyeju wunli hku nna, galai kau ai rai nga ai. Ndai mabyin hte seng nna, madung gaw anhte a myit masa nan rai nga ai.

Dai majaw hpa lam ni hta raitim, kaja ai hku hkap la chye ai rai yang yawng gaw, Madu Karai a shaman chyeju ni nan rai nga ai. Matsan jam jau ai, kaw si hpang gara hkrum ai, hkrap ngu hkrap ngoi ai, kaya kahpa hkrum ai, n ju n dawng hkrum sha ai. Ndai lam ni hpe kadai wa mung n ra sharawng nga ai. Raitim dai lam ni mahkra gaw Madu Karai a man e, shaman chyeju wunli ni nan rai nga ai. Dai majaw, anhte ni yawng ninggun la nna, shakut sa wa ga law. Shaloi jang shi Madu kaw na wunli lu la na teng sha rai nga ai. Dai ni gaw San pra ai Peter Claver a poi ninghtoi rai nga ai. Ndai San pra ai wa kaw mung wunli lu hkra chyeju ni hpyi la nga ga law.