SHINGGYIM MASHA A SARI SADANG HPE KARAI KASANG A KUMHPA HKU NNA GALOI MUNG MAKAWP MAGA RA AI

Wa Sarabyin Leo XIV gaw September 10 ya shani na General Audience hta shinggyim masha a sari sadang hpe ap nawng da let, Hkristan ni hpe masa lam shagu hta “Kabu Gara Shiga a nhtoi hte n-gun atsam” hte makawp maga na matu tsun shadut da ai.

Second Vatican Council a Pastoral Constitution ‘Gaudium et spes’ hte seng nna matut myit sumru ai lam galaw let, Wa Sarabyin gaw, npawt nhpang shinggyim ahkaw ahkang hpe masat masa galaw ai lam gaw, shinggyim labau hta ahkyak dik htum awng dang lam langai mi re, nga nna tsun lai wa ai.

Wa Sarabyin Leo tsun ai hta, Nawku hpung gaw ndai hkrun lam hpe madi shadaw ya ai hku nna, sari sadang gaw masha langai hte langai a hkum hkrang kaw nna pru wa ai hpe bai shadum ya nga ai.

Shi a shadum jahprang laika ‘Magnifica humanitas’ hpe lakap nna, shinggyim masha shagu gaw Karai kasang hte, kaga masha ni hte, hpan da ai lam ni hte kanawn mazum na matu, “Karai Kasang ra sharawng ai lam re” ngu ai hpe ahkyak shatai tsun da nga ai.

“Shinggyim masha a sari sadang gaw masha langai a atsam marai, sutgan (sh) prat hta nga ai shara ni hta myit maju n jung ai sha, kaja ai, shut ai hku lata la ai lam ni hta mung n-nga ai” nga nna tsun ai. “De a malai, Karai Kasang gaw Shi a n htum n wai tsawra myit hpe madun dan ai hku nna jaw ya ai, masha langai hte langai a matu kumhpa rai nga ai.”

Ndai n htum n wai ai sari sadang gaw Karai Kasang a hkrang sumla hte shinggyim masha ni hpe hpan da ai hta ru jung nga ai lam Wa Sarabyin sang lang dan ai. Shinggyim masha ni gaw anhte a Hpan Madu hpe chye chyang tsawra lu ai atsam nga ai rai nna, ngam ai hpan da ai lam yawng hpe anhte lit la makawp maga na matu ap da ai.

Hkristu gaw, shinggyim masha hpe shi hkum shi hpaw shadan dan nna, anhte a tsaw dik htum ai shaga la ai lam hpe chye shangun ai hku nna, ndai sari sadang a npawt nhpang hpe hpaw shadan dan nga ai, nga nna matut tsun ai.

Wa Sarabyin Leo matut tsun ai hta, shinggyim masha a sari sadang hpe langai hkrai sha nga ai rai yang galoi mung chye na na nre lam tsun ai.

“Masha langai tai na ngu ai gaw, hkap la ai, shada da bai htang ai hte daw jau ai hku nna, garan gachyan na kumhpa langai hku nna hkam la ai, rawt jat galu kaba wa ai ngu ai lachyum re” nga nna tsun ai.

Dai majaw sari sadang ngu ai gaw, tinang hkum tinang lit la ra ai lam hte kaga masha ni hte rau kahkyin gumdin lam lahkawng yan hpe tsun mayu ai. Shada da yu lanu lahku hkat na matu hte shinggyim masha a chye na hkawn hkrang ai lam hpe n tara ai hku hkalem hkalau ai lam amyu myu hpe ninghkap na matu tsun shadut da nga ai.

Shinggyim masha ni gaw yubak mara a majaw hkala nba hkrum nna, tinang a kata kaw garan ginhka nga ai, kaja ai hte n kaja ai lapran na gasat gala lam hta rim hkrum nga ai hpe Wa Sarabyin yin la nga ai.

Raitim, Hkristan ni gaw ndai n-gun kya ai lam hpe myit mada shara hte hkrum katut lu ai, hpa majaw nga yang, Hkristu gaw shinggyim masha ni hpe kata kaw nna lawt lu hkra, n-gun shaja ya, nnan bai gram lajang na matu du sa ai majaw re, nga nna tsun ai.

Gaudium et Spes hpe lakap nna, hkum hkrang hte wenyi hpe garan ginhka ai lam hpe ningdang kau nna, shinggyim masha gaw “hkum hkrang hte wenyi gaw galaw sa ai lam n bung ai raitim, langai sha re” ngu ai hpe bai myit dum shangun ai.

Hkum hkrang hpe ra sharawng ai hku jai lang mai ai (sh) kabai kau mai ai arung arai langai zawn mu mada ai gaw shinggyim sari sadang hpe ningdang kau ai lam re, nga nna tsun ai.

Hkum hkrang hpe Karai Kasang hpan da nna, hkrung rawt na matu lajang da ai majaw, kaja ai hte hkungga ging ai ngu sawn la ra ai.

Dai hpang Wa Sarabyin gaw, shinggyim masha a sari sadang hpe madun dan ai ahkyak ai lam masum hku nna, hpaji byeng-ya, myit masin, lawt lu lam ni hpe madi madun dan ai. Hpaji byeng-ya gaw tengman ai lam hpe tam ai, myit masin gaw prat hpe kahkyin gumdin lam hte lachyum jaw ai, lawt lu ai lam gaw anhte dawdan ai lam ni a matu masha ni hpe lit la shangun ai.

Chyoi Pra ai Wenyi gaw anhte hpe hkrit tsang ai lam kaw na shalawt ya nna, Karai Kasang a kashu kasha ni hku nna anhte a sari sadang hpe shagrin da ya ai lam hpe bai myit dum shangun let, Wa Sarabyin shi mungga hpe hpungdim dat ai.

“Karai Kasang a hkrang sumla hte hpan da hkrum ai, Hkristu a marang e, Shi a matu, anhte gaw laklai ai hte n mai yeng seng kau lu ai sari sadang hpe lu la saga ai” . “Dai hpe galoi mung n-gun jaw, makawp maga na matu anhte hkum nan myit daw dan da ga.”