“Madu a kabu gara shiga, hkaw tsun ai, prat dep Kasa ni tai nga ga.”
“Shat daw sha ai ahkying du jang, shaga da sai ni hpe; sa marit, lu sha yawng jin masai; ngu nna shi a mayam hpe shaga shangun dat wu ai.”
Daini hti ang ai Ja Chyum mungga hta, Madu Yesu gaw, daw sha poi de shaga la hkrum ai ni, n-sa wa ai lam hpe tsun da nga ai.
Madu Yesu a daw sha poi, shaga ai kaw, masha hpan lahkawng, hpe mu lu nga ga ai.
No.1 Hpan mi gaw, daw sha poi de shaga da hkrum ai ni,
No.2 Hpan mi gaw, masha ni hpe saw shaga hkawm ai, Madu a mayam ni rai nga ai.
Daw sha poi gaw, Madu a Sumsing daw sha poi hpe tsun da ai lam rai nga ai. Sumsing daw sha poi de, shaga da hkrum ai ni hpe, a lu sha, sa wa na matu, shi a mayam ni hpe dat n na, saw shaga ai shaloi, shaga da hkrum ai ni, law malawng gaw, bungli n rau ai majaw, daw sha poi de n lu sa shi ai lam tsun ma ai. Dai, Madu a daw sha poi de, n sa byin ai ni gaw, Pharishe ni the Madu hpe n hkap la ai ni rai ma ai. Pharishe ni gaw, Madu hpe chye nga ninglen, Madu galaw ai mau hpa ni hpe, mu nga ninglen e, n hkap la ai ni rai ma ai. Shanhte ni galaw ra ai lam ni hpe sha, hkan galaw jahpai let, Madu a daw sha poi de n sa ai ni rai nga ma ai.
Anhte ni mung, magam bungli ni a majaw, Madu a daw sha poi de, n sa byin ai ni, n tai na matu, grai sadi ra nga ai. Anhte ni mung, Madu a Sumsing daw sha poi de, shaga la hkrum ai masha ni rai nga ga ai hpe myit dum nga ga. Kashin kamun hkam la da ai a marang e, anhte ni yawng gaw, Madu a Sumsing daw sha poi de, shaga la hkrum ai ni rai nga ga ai. Anhte galaw ra ai magam bungli ni hpe sha, jahapai nhtawm, Nawku Jawng mung nsa, Mara n raw, Chyoi Prahkum mung N hkam, rai nna, nga pra nga yang gaw, Madu a Sumsing daw sha poi de, n-sa ai Hparishe ni hte Madu hpe n hkap la ai ni zawn, byin mat na rai nga ai. Dai majaw, daw sha poi de, shaga da hkrum ai anhte ni, Madu a Sumsing daw sha poi de, gingdan ai hte shang lu ai ni, byin tai wa hkra, shakut nga ga.
No.2 masha ni hpe saw shaga hkawm ai Mayam ni gaw, Madu a sape ni rai nga ma ai. Madu a sape ni gaw, kabu gara ai shiga ni hpe, htawn tsun hkawm let, masha law law hpe, Madu hpang de woi wa ai ni rai nga ma ai. Madu a Kasa ni, Sape ni gaw, shanhte a, nga sat nga sa ai lam, sak hkrung hkawm sa ai lam ni hte, kabu gara shiga hkaw tsun nna, tinang a asak hpe pyi, ap kau ai ten du hkra, sakse hkam lai wa sai.
Anhte hkum ngau shagu mung, Madu a mayam ni, sape ni, rai nga ga ai. Anhte mung, shi a sape ni zawn, Madu a kabu gara ai shiga ni hpe, masha law law hpe garan gachyan lu ai ni, byin tai wa hkra, shakut ra nga ai. Anhte a prat hta, Madu a kabu gara ai shiga hpe, n-gup hte sha, tara
hkaw hkawm yang, kadai mung madat na n rai nga ai. Raitim, anhte hkum ngau shagu, Madu a
tara hpe, ta tut shadik shatup hkawm sa wa jang, masha law law Madu hpang de gayin wa na rai nga ai.
Anhte a sak hkrung hkawm sa ai lam shagu hta, Madu Yesu a kabu gara ai lam hpe hkaw tsun a Madu a prat dep, kasa ni, Madu a prat dep mayam ni tai nga ga.
Madu Yesu gaw anhte yawng hpe tsawra ai majaw anhte a shut hpyit mara ni hpe raw dat ya, ra ai akyu chyeju ni hpe jaw ya, makawp maga ya, shi a Hkum hte Sai hpe jaw ya let, anhte yawng hpe zinglum la nga ai, Shi Madu a Ja Chyum Mungga ni hpe madat mara let shi a singkaw npu e shingbyi lu hkra hkawm sa nga ga.
