Daini na Ja Chyum Mungga hpe hti sumru yu ai shaloi e, Martha hte Maria a lam hpe na lu ga ai. Marhta gaw Madu Yesu hpe lu sha galaw daw na matu amu kyin taw nga ai aten hta, Maria gaw, Madu Yesu a lagaw n hpang e dung nga let, Madu a sharin shaga ai lam ni hpe madat taw nga ai lam hpe tsun da nga ai. Madu Yesu gaw Martha hpe nang gaw magam bungli ni hta sha myit pu ba taw nga ai ngu tsun ai shaloi, ahkyak madung hte kaga lamang lam ni hpe e garan ginhka nna, madung tawn da chye hparan galaw sa ra ai hpe sharin ya nga ai.
Rai nga ai, ya daini mungkan hta e, anhte yawng hte gaw magam bungli hta sha kyin taw nga ga ai. Hpaga yunga lam, shinggyim nau na kanawn mazum lam, hpaji hparat lam ni hpang hkan nna, pu ba taw nga ga ai. Oh hpu nau wa nang a nrau nhtau kyin la ai aten kaw nna, Madu Karai hpang de bai gayin wa rit. Madu Karai hte arau nga lu hkra shakut ga. San pra ai Augustine tsun ai, Madu Karai Kasang hpe n tam n mu dingsa, anhte a myit masin salum gaw, simsa lam n nga ai ngu ai hpe nang dum nga u. Shingrai Maria zawn, Madu Yesu a lagaw nhpang kaw dung nna, sharin ya ai lam hpe madat la nna, ninggun la nga ga law. Bai Martha zawn ra ai magam bungli ni hta e mung hkan sa shatup let, sak hkrung nga sa ga law.
