Wa Sarabyin gaw laknak hpe gyin  shalaw jat na malai, shinggyim sari sadang, jahkrum bawngban lam, mung masa lam, simsa lam ni hpe grau ahkyak shatai na lam, hpyen masa jai gumhpraw hte Nuclear laknak ni hte seng  nna grai myit tsang ai lam tsun shapraw da  nga ai.

Wa Sarabyin Leo XIV a simsa lam mungga hpe Wa Saradaw Kaba Cardinal Charles Bo gaw manu jahpu kaba ai mungga langai re ngu manu shadan tsun da  nga ai. Hpa majaw nga yang, daini na mungkan a matu sha n-ga, Myanmar mung  a matu mung  akyu rawng nga ai.  San Seng Chyoi Pra ai anhte yawng a Kawa Karai Kasang hku nna laknak gyin shalaw jat ai hte simsa lam gaw gap lu na rai nga ai, adip arip di ai, jahkrit shama ai, tinang ra sharawng ai hku chyu sha kaga ni hpe shadik shatup ai gaw manghkang ni hpe hparan ya lu na n re. Majan gaw chyahkring chyahkra simsa lam hpe jaw ya lu tim, jet ai hte ngang grin ai simsa lam hpe gawgap lu na n rai nga ai. Simsa lam gaw bawngban jahkrup ai hku nna gawgap ai lam re, dai gaw shani shagu gawgap ra ai lam langai mi re, tara rap ra ai lam hte shinggyim sari sadang hpe hkungga ai lam hku nna gawgap ra ai lam re, nga nna mung Wa Sarabyin tsun da nga ai.

Ndai lam gaw anhte Myanmar  mungdan hte mung grai seng nga ai. Anhte amyu sha ni shaning law law mayak manhkang, roi rip hkrum ai lam, tinang a mare buga hpe hprawng yen ra ai lam, tsin-yam tsindam hkrum sha nga ga ai. Ndai masa lam  hta “kadai wa dang na kun ” ngu ai hta n re sha “anhte gara hku nna masha  asak hpe hkye la na, simsa lam hpe gara hku gawgap na kun?” ngu nna she anhte ni jawm dinglik yu nga ga.

Mungkan mungdan ni a man hta mung, Myanmar mung hte seng nna, Wa Sarabyin galoi mung tsun shaga lai wa sai rai nga ai. 2026 ning January shata hta, Myanmar  Mungdan a shinggyim nga pra masa hte shim lam manghkang a matu simsa lam, yawng hpe hkap la ai bawngban hpawng, rap ra ai hte aten dep shinggyim garum ningtum ni hpe lu la hkra lam tam na matu mung, dat kasa hkringmang ni hpe tsun shadut lai wa sai.

Ndai Wa Sarabyin a nsen gaw Myanmar mung masha ni a matu myit mada shara jaw ya ai nsen langai hku nna ngai mu mada nngai. Nawku hpung a lit gaw maga mi de tsap nna mung masa ahkaw ahkang hpe zing la na matu n re. Anhte a lit gaw, shinggyim masha ni a asak hpe makawp maga na, shinggyim sari sadang hpe makawp maga na, tengman ai lam hpe tsun shaga na, masha ni a lapran htinglu htinglai lam hte simsa lam a matu mahkrai ni hpe gawgap na lit rai nga ai. Dai majaw Nawku Hpung hta ahkyak ai lit nga ai. Rasha hte Ukraine ni lawm ai, manghkang byin nga ai mungdan ni a ningbaw ningla ni hpe “majan gasat ai lam  hku n re sha,  rau jawm dung jahta nna, bawngban jahkrup, hparan ladat tam” na matu mung matut manoi saw shaga ra ai.

Dai majaw ndai Wa Sarabyin a nsen hpe anhte ni tup hkrak madat la ra ai ngu kam nngai. Simsa lam ngu ai gaw gawng kya ai lam n rai nga ai. Bawng ban jahkrum ai ngu ai gaw asum jaw ai lam n re. Mara raw hkat ai lam hte htinglu htinglai ai lam gaw gawng kya ai ni a lam n rai, shinggyim masha ni a shawng lam hpe hkye la lu ai magrau grang ai lam rai nga ai.

Anhte Myanmar  mung a matu ngai a  akyu hpyi ga langai mi mung nga ai—

Laknak ni zim mat nga u ga.

Shinggyim asak makawp maga  lu ga law.

Bawng ban jahkrum ai hpe hpang ga.

Bai nna simsa lam hpe rau jawm gawgap sa wa ga.

Ndai gaw Wa Sarabyin Leo XIV a nsen sha n-ga, Kabu Gara Shiga a nsen mung rai nga ai.